چیئرمین واپڈا نوید اصغر چوہدری نے آج نیوز کے پروگرام ”روبرو“ میں گفتگو کرتے ہوئے انکشاف کیا کہ بھارت کی جانب سے پانی بند کرنے کی دھمکیوں کے بعد پاکستان نے پیشگی حفاظتی اقدامات شروع کر دیے ہیں۔ انہوں نے بتایا کہ دریائے چناب پر ضلع چنیوٹ کے قریب نیا ڈیم تعمیر کیا جائے گا تاکہ آبی سلامتی کو یقینی بنایا جا سکے۔

چیئرمین واپڈا نوید اصغر چوہدری ںے آج نیوز کے پروگرام ”روبرو“ میں میزبان شوکت پراچہ کے ہمراہ سے خصوصی گفتگو کی۔ چیئرمین واپڈا نے بتایا کہ دریائے چناب پر پانی ذخیرہ کرنے کے لیے نیا ڈیم تعمیر کیا جائے گا تاکہ بھارت کے ممکنہ آبی حملے کا مؤثر جواب دیا جا سکے۔

انہوں نے کہا کہ یہ ڈیم ضلع چنیوٹ کے قریب تعمیر کیا جائے گا اور اس کا مقصد نہ صرف پانی کا ذخیرہ بڑھانا ہے بلکہ قومی آبی سلامتی کو بھی یقینی بنانا ہے۔

نوید اصغر چوہدری کا کہنا تھا کہ واپڈا ملک کے آبی وسائل کے تحفظ کے لیے ہمہ وقت متحرک ہے اور موجودہ علاقائی حالات کے پیش نظر ڈیمز کی تعمیر ناگزیر ہو چکی ہے۔ وفاقی حکومت نے چناب پر اسٹوریج کا کہا ہے، ہم کوشش کریں گے تمام اسٹوریج منصوبے جلد مکمل ہوں۔

واضح رہے کہ بھارت کی جانب سے ان دنوں سندھ طاس معاہدے کی سنگین خلاف ورزی کی جارہی ہے، جس پر پاکستانی حکام شدید تشویش کا اظہار کر چکے ہیں۔