ڈیرہ اسماعیل خان کے علاقے کلاچی میں دہشت گردی کا افسوسناک واقعہ پیش آیا، جہاں یادگار چوکی کے قریب نامعلوم افراد کی فائرنگ سے دو پولیس اہلکار شہید ہو گئے۔

پولیس کے مطابق شہید اہلکاروں کی شناخت گل محمد اور شہزاد خان کے نام سے ہوئی ہے، جو یادگار پولیس چوک پر تعینات تھے۔ دونوں اہلکار قریبی دکان پر جارہے تھے کہ گھات لگائے دہشت گردوں نے ان پر فائرنگ کر دی۔

واقعے کے بعد حملہ آور موٹرسائیکل پر فرار ہوئے۔ سیکیورٹی فورسز نے علاقے کو گھیرے میں لے کر سرچ آپریشن شروع کر دیا، جبکہ شہید اہلکاروں کی میتیں کلاچی اسپتال منتقل کر دی گئی ہیں۔

متعدد دہشتگرد حملوں میں ملوث بدنام زمانہ خارجی ہلاک، ورثاء کا لاش لینے سے انکار

پولیس اہلکاروں کے قاتل دہشتگردوں کی فرار کی کوشش ناکام، ایک ہلاک، دو زخمی

ڈیرہ اسماعیل خان میں پولیس اہلکاروں کو شہید کرنے والے دہشتگردوں کی فرار کی کوشش بھی ناکام بنا دی گئی۔ پولیس کی فوری اور مؤثر کارروائی کے نتیجے میں ایک دہشتگرد ہلاک جبکہ دو زخمی ہو گئے۔

پولیس کے مطابق ہلاک ہونے والے دہشتگرد کے قبضے سے کلاشنکوف اور بھاری مقدار میں ایمونیشن بھی برآمد ہوا ہے، جس سے واضح ہوتا ہے کہ دہشتگرد کسی بڑے حملے کی منصوبہ بندی کر رہے تھے۔

سی ٹی ڈی اور ضلعی پولیس کی مشترکہ کارروائی کے دوران علاقے میں سرچ آپریشن بھی جاری ہے، تاکہ دہشتگردوں کے دیگر ساتھیوں کو گرفتار کیا جا سکے اور علاقے کو مکمل طور پر محفوظ بنایا جا سکے۔

سیکیورٹی حکام کا کہنا ہے کہ دہشتگردوں کے خلاف کارروائیاں مزید تیز کر دی گئی ہیں اور ان کے سہولت کاروں کو بھی جلد قانون کی گرفت میں لایا جائے گا۔

ڈی آئی خان میں حالیہ دہشتگردی کے واقعات کے بعد قانون نافذ کرنے والے ادارے مکمل الرٹ پر ہیں اور فتنہ الہندوستان سے وابستہ دہشتگرد عناصر کے خلاف بھرپور کارروائی جاری ہے۔ عوام سے بھی اپیل کی گئی ہے کہ کسی بھی مشکوک سرگرمی کی فوری اطلاع متعلقہ حکام کو دیں تاکہ امن دشمنوں کو ناکام بنایا جا سکے۔

لکی مروت میں تخریب کاری، پنجاب جانے والی گیس پائپ لائن اڑا دی گئی

وزیرداخلہ محسن نقوی کی مذمت، شہداء کو خراج عقیدت

وفاقی وزیر داخلہ محسن نقوی نے خیبرپختونخوا کے علاقے کلاچی میں فتنہ الہندوستان سے تعلق رکھنے والے دہشتگردوں کی جانب سے پولیس اہلکاروں پر فائرنگ کی شدید مذمت کی ہے، جس میں دو اہلکار جامِ شہادت نوش کر گئے۔

وزیر داخلہ نے شہید ہونے والے پولیس اہلکاروں کو خراجِ عقیدت پیش کرتے ہوئے کہا کہ ان کی قربانی کو رائیگاں نہیں جانے دیا جائے گا۔ محسن نقوی نے شہداء کے لواحقین سے دلی ہمدردی اور تعزیت کا اظہار کیا۔

اپنے بیان میں وزیر داخلہ نے کہا کہ خیبرپختونخوا پولیس دہشتگردی کے خلاف جنگ میں صفِ اول کا کردار ادا کر رہی ہے، اور ان کے جری جوانوں کی قربانیاں قابل فخر اور پوری قوم کے لیے مشعلِ راہ ہیں۔

انہوں نے اس عزم کا اعادہ کیا کہ پاکستان کی ریاست اور سیکیورٹی ادارے وطن دشمن عناصر کو ان کے انجام تک پہنچا کر دم لیں گے۔ محسن نقوی کا کہنا تھا کہ فتنہ الہندوستان کی سرپرستی میں سرگرم دہشتگرد عناصر ملک کے امن کو سبوتاژ کرنے کی مذموم کوشش کر رہے ہیں، جنہیں کسی صورت کامیاب نہیں ہونے دیا جائے گا۔

وزیر داخلہ نے اس موقع پر متعلقہ اداروں کو ہدایت کی کہ شہداء کے خاندانوں کی ہر ممکن معاونت کی جائے اور دہشتگردوں کے خلاف کارروائی مزید تیز کی جائے تاکہ امن دشمن عناصر کا قلع قمع کیا جا سکے۔