وفاقی حکومت نے ملک بھر میں امن و امان کی صورتحال بہتر بنانے اور قانون نافذ کرنے والے اداروں کی صلاحیت کو بڑھانے کے لیے اہم فیصلہ کر لیا۔ فرنٹیئر کانسٹیبلری کو ایک نئی حیثیت دے دی گئی ہے اور اب یہ فورس فیڈرل کانسٹیبلری کہلائے گی۔ وزیرداخلہ برائے مملکت طلال چوہدری نے وضاحت دی کہ ایف سی کا نیا نام فیڈرل کانسٹیبلری رکھا ہے، یہ وفاقی پولیس نہیں۔ ابہام ختم ہونا چاہیے۔ اس اقدام سے اٹھارویں ترمیم کا کوئی تعلق نہیں۔

صدر مملکت نے فرنٹیئر کانسٹیبلری ری آرگنائزیشن آرڈیننس 2025 جاری کر دیا ہے، جس کے تحت فرنٹیئر کانسٹیبلری کو ملک گیر فیڈرل فورس میں تبدیل کر دیا گیا ہے۔ نئے آرڈیننس کے تحت ایف سی اب صرف مخصوص علاقوں تک محدود نہیں رہے گی بلکہ چاروں صوبوں، اسلام آباد، آزاد جموں و کشمیر اور گلگت بلتستان میں بھی اپنا کردار ادا کر سکے گی۔

آرڈیننس کے مطابق فیڈرل کانسٹیبلری کا آئی جی وفاقی حکومت تعینات کرے گی۔ ہر ڈویژن میں ایک ونگ کمانڈر تعینات کیا جائے گا، جس کا رینک ڈپٹی انسپکٹر جنرل کے برابر ہو گا۔ وفاقی حکومت ریزرو فورس بھی بھرتی کر سکے گی اور فورس سے متعلق نئے قواعد و ضوابط بھی جلد تشکیل دیے جائیں گے۔

فیڈرل کانسٹیبلری کے دائرہ اختیار میں توسیع سے نہ صرف بین الصوبائی کوآرڈینیشن مضبوط ہو گی بلکہ ملک گیر سطح پر انسداد دہشت گردی اور جرائم کی روک تھام میں بھی مدد ملے گی۔

وزیر مملکت داخلہ طلال چوہدری کی میڈیا سے گفتگو

وزیر مملکت داخلہ طلال چوہدری نے فیصل آباد میں میڈیا سے گفتگو میں کہا کہ ایف سی کا قیام 1913 میں ہوا، ماضی میں ایف سی حکومت کےماتحت کام کرتی رہی، ایف سی کی تنخواہیں پولیس سے کم تھیں، ایف سی نے ملک کے لیے بے شمار قربانیاں دیں، فرنٹیئرکانسٹیبلری اب فیڈرل کانسٹیبلری کہلائے گی۔

طلال چوہدری نے کہا کہ صدر نے فرنٹیئر کانسٹیبلری ری آرگنائزیشن آرڈیننس 2025 جاری کیا۔ یہ چاروں صوبوں، اسلام آباد میں کام کرنے کا اختیار رکھے گی، 18 ویں ترمیم آئینی اسٹرکچردیکھتے ہوئے نام تبدیل کیا گیا، ایف سی کی تربیت کے حوالے سے کام کر رہے ہیں۔ فیڈرل کانسٹیبلری اور پولیس دونوں مختلف محکمے ہیں، ایف سی میں ملک بھر سے بھرتیاں کی جائیں گی۔

اس موقع پر کمانڈنٹ ایف سی ریاض نذیر نے کہا کہ فیڈرل کانسٹیبلری کے41 ونگز ہوں گے، ایف سی کو 6 ڈیویژن میں تقسیم کیا جا رہا ہے، اسپیشل پروٹیکشن ونگ بھی قائم کی گئی، ایف سی کو جدید خطوط پر استوار کر رہے ہیں۔