تاجکستان سے تعلق رکھنے والے معروف گلوکار، سوشل میڈیا شخصیت اور بھارتی ریئلٹی شو ’بگ باس 16‘ کے سابق شریک عبدو روزق کو حال ہی میں دبئی ایئرپورٹ پر حراست میں لے لیا گیا۔ یہ گرفتاری اُس وقت عمل میں آئی جب وہ یورپی ملک مونٹی نیگرو سے واپس دبئی پہنچے۔

ابدو روزق کی پبلک ریلیشنز ٹیم نے اس گرفتاری کی تصدیق کرتے ہوئے بتایا کہ معاملہ ہفتے کی صبح پیش آیا۔ اگرچہ اس گرفتاری کی وجوہات پر سرکاری سطح پر کوئی وضاحت نہیں دی گئی، لیکن عبدو کی ٹیم کے ایک نمائندے نے عرب میڈیا کو بتایا کہ انہیں مبینہ طور پر ’چوری‘ کے ایک کیس میں حراست میں لیا گیا ہے۔ تاہم، مزید تفصیلات فراہم کرنے سے گریز کیا گیا ہے۔

چھوٹے قد کی وجہ سے مشہور گلوکار بگ باس سیزن 16 کا کنٹسٹنٹ بن گیا

دوسری جانب دبئی کے حکام کی جانب سے تاحال کوئی باضابطہ بیان جاری نہیں کیا گیا، جس کی وجہ سے عبدو کے مداحوں میں تشویش پائی جاتی ہے۔

21 سالہ عبدو روزق، جن کا قد محض 100 سینٹی میٹر ہے، دنیا کے سب سے چھوٹے قد کے گلوکار کے طور پر جانے جاتے ہیں۔ ’بگ باس‘ میں شرکت کے بعد انہیں جنوبی ایشیا، خاص طور پر بھارت اور پاکستان میں بڑی مقبولیت حاصل ہوئی۔ وہ گزشتہ کچھ برسوں سے دبئی میں مقیم ہیں اور انہیں دبئی کا گولڈن ویزا بھی حاصل ہے۔

والدین کے چھوٹے قد کے باوجود بچہ لمبا کیسے ہو سکتا ہے ؟

کچھ عرصہ قبل عبدو نے ممبئی میں مستقل قیام کی خواہش کا بھی اظہار کیا تھا، تاہم اب ان کی موجودہ گرفتاری نے ان کے مستقبل پر سوالیہ نشان لگا دیے ہیں۔