وفاقی وزیر احسن اقبال نے واضح کیا ہے کہ تحریک انصاف کیلئے بہتر ہے کہ مثبت سیاست کرے، چوبیس کروڑ عوام کی ترقی کو روکنے نہیں دیں گے۔ بھارت پاکستان میں دہشتگردی کی بزدلانہ کارروائیاں کر رہا ہے۔

وفاقی وزیر منصوبہ بندی احسن اقبال نے خبردار کیا ہے کہ پاکستان اس وقت ترقی کی اڑان پر ہے، اگر تحریک انصاف نے اس راستے میں رکاوٹیں ڈالنے کی کوشش کی تو حکومت سختی سے نمٹے گی۔ ان کا کہنا تھا کہ پی ٹی آئی کے لیے یہی بہتر ہوگا کہ وہ مثبت سیاست کا راستہ اختیار کرے اور قومی ترقی میں اپنا کردار ادا کرے۔

لاہور میں گفتگو کرتے ہوئے احسن اقبال نے کہا کہ موجودہ حکومت ملک کو سیاسی، معاشی اور سماجی میدانوں میں آگے لے جانے کے لیے پرعزم ہے، اور چوبیس کروڑ عوام کی ترقی کو روکنے کی اجازت نہیں دی جائے گی۔

احسن اقبال نے واضح کیا کہ پاکستان اس وقت دہشت گردی کے خلاف فیصلہ کن جنگ لڑ رہا ہے۔ بھارت پاکستان میں دہشت گردی کی بزدلانہ کارروائیاں کروا رہا ہے اور ان دہشت گردوں کو بھارتی اداروں سے مدد حاصل ہے۔ ان کا کہنا تھا کہ ’’یہ دہشت گرد بھارت کے پے رول پر ہیں، اور ریاستی ادارے ان کے خلاف بھرپور کارروائی کر رہے ہیں۔‘‘