پاکستان کی بزنس کمیونٹی نے حکومت کی جانب سے فیڈرل بورڈ آف ریونیو (ایف بی آر) کو اختیار دینے کے خلاف 19 جولائی کو ملک گیر ہڑتال کا اعلان کردیا۔

وفاق ایوان ہائے صنعت و تجارت (ایف پی سی سی آئی) کے صدر عاطف اکرام اور کراچی چیمبر آف کامرس کے جاوید بلوانی نے حکومت کی جانب سے ایف بی آر کو اختیار دینے کے خلاف 19 جولائی کو ملک بھر میں ہڑتال کا اعلان کردیا۔

ایف پی سی سی آئی کے صدر عاطف اکرام کا کہنا تھا کہ نہ صرف ہڑتال میں شامل ہوں گے بلکی اسے لیڈ بھی کریں گے، ایف پی سی سی آئی ملک بھرکے تمام چیمبرز کے ساتھ کھڑی ہے۔

کراچی چیمبر آف کامرس کے جاوید بلوانی نے بھی 19 جولائی کو کاروبار بند رکھنے کا اعلان کیا اور کہا کہ ہم ایف بی آر کے قانون 37 ڈبل اے، 37 بی پر ٹوکن ہڑتال کریں گے، اگر حکومت نے ہمارے مطالبات نہ مانے تو دائرہ کار وسیع کریں گے، ہڑتال میں لاہور چیمبر، فیصل آباد چیمبر، سیالکوٹ چیمبر ،روالپنڈی چیمبر بھی شامل ہیں۔

جاوید بلوانی نے مزید کہا کہ بزنس کمیونٹی عزت کے ساتھ ٹیکس دینا چاہتی ہے، ایف بی آر کو جو اختیارات دیے ہیں اس میں کاروبار ممکن نہیں۔