قازقستان نے عوامی مقامات پر چہرہ ڈھانپنے والے نقاب پر باضابطہ طور پر پابندی عائد کر دی ہے۔ صدر نے اس سلسلے میں بل پر دستخط کرتے ہوئے قانون کو فوری طور پر نافذ کرنے کی منظوری دے دی۔

قانون کے مطابق ایسے لباس جن سے چہرے کی شناخت میں رکاوٹ پیدا ہو، اُن پر عوامی مقامات پر پابندی ہوگی۔ حکومتی اعلامیہ میں کہا گیا ہے کہ یہ اقدام سیکیورٹی خدشات کے پیش نظر کیا گیا ہے تاکہ عوامی مقامات پر لوگوں کی پہچان ممکن بنائی جا سکے۔

قازقستان میں یہ فیصلہ ایک ایسے وقت میں سامنے آیا ہے جب اس سے قبل 2024 میں مسلم اکثریتی ملک تاجکستان نے بھی سرکاری طور پر حجاب پر پابندی عائد کر دی تھی، جس پر دنیا بھر میں بحث چھڑ گئی تھی۔

نئے قانون پر مختلف حلقوں کی جانب سے ملے جلے ردعمل کا اظہار کیا جا رہا ہے۔ انسانی حقوق کی تنظیموں نے اس اقدام کو مذہبی آزادی کی خلاف ورزی قرار دیا ہے، جب کہ حکومت کا مؤقف ہے کہ یہ قانون سیکیورٹی اور سماجی ہم آہنگی کے فروغ کے لیے ناگزیر ہے۔