وفاقی وزیر دفاع خواجہ محمد آصف شنگھائی تعاون تنظیم (ایس سی او) کے وزرائے دفاع کے اہم اجلاس میں شرکت کے لیے چین پہنچ گئے ہیں۔ یہ اجلاس کل متوقع ہے، جس میں خطے کی سیکیورٹی صورتحال، انسداد دہشت گردی اقدامات اور دفاعی تعاون کے امور زیر بحث آئیں گے۔

ذرائع کے مطابق اجلاس میں بھارت کے وزیردفاع راج ناتھ سنگھ بھی شریک ہوں گے تاہم پاک بھارت وزرائے دفاع کے درمیان کسی قسم کی دوطرفہ ملاقات طے نہیں کی گئی ہے۔ سفارتی ذرائع نے واضح کیا ہے کہ موجودہ صورتحال کے تناظر میں دونوں ممالک کے وزرائے دفاع کی ملاقات کا کوئی شیڈول نہیں بنایا گیا۔

اجلاس کے دوران خواجہ آصف دیگر رکن ممالک کے ہم منصبوں سے ملاقاتیں بھی کریں گے اور خطے میں امن و استحکام کے لیے پاکستان کے مؤقف کو اجاگر کریں گے۔

یاد رہے کہ شنگھائی تعاون تنظیم ایک اہم علاقائی فورم ہے جس میں چین، روس، بھارت، پاکستان، اور وسطی ایشیائی ریاستیں شامل ہیں۔ یہ فورم سیکیورٹی، معیشت اور علاقائی تعاون کے میدان میں مشترکہ اہداف کے لیے کام کرتا ہے۔