انسداد دہشت گردی عدالت کراچی میں مہاجر قومی موومنٹ کے سربراہ آفاق احمد اور دیگر 11 ملزمان کے خلاف اشتعال انگیز تقریر، کنٹینر نذر آتش کرنے اور چوری کے مقدمے کی سماعت ہوئی، تاہم عدالت میں فردِ جرم عائد نہ ہو سکی۔

عدالت نے کیس کی سماعت 21 جون تک ملتوی کرتے ہوئے آئندہ سماعت پر ملزمان پر فردِ جرم عائد کرنے کی ہدایت جاری کی ہے۔

پولیس کے مطابق آفاق احمد نے آڈیو میسج کے ذریعے کارکنان کو اشتعال دلایا اور انہیں توڑ پھوڑ اور جلاؤ گھیراؤ پر اکسایا۔ تفتیشی حکام کا کہنا ہے کہ آفاق احمد کی ایما پر لانڈھی کے علاقے میں ایک کنٹینر کو آگ لگائی گئی، جس میں موجود چینی کی بوریاں بھی چوری کر لی گئیں۔

ڈمپر جلانے کا مقدمہ: آفاق احمد اور ساتھیوں پر فرد جرم عائد کرنے کی تاریخ مقرر

پولیس نے عدالت کو بتایا کہ ملزمان نے اعتراف کیا ہے کہ کنٹینر کو نذر آتش کرنے کا حکم آفاق احمد نے دیا تھا۔ یہ مقدمہ لانڈھی تھانے میں درج کیا گیا تھا، جبکہ آفاق احمد اس مقدمے میں ضمانت پر رہا ہیں۔