خیبرپختونخوا کے علاقے نوشہرہ کینٹ کی حدود میں ایک دل دہلا دینے والا واقعہ پیش آیا جہاں آٹھ ماہ کی حاملہ خاتون عظمیٰ کو مبینہ طور پر زندہ جلا دیا گیا۔ مقتولہ گزشتہ روز سے پرسرار طور پر لاپتا تھی۔

پولیس کے مطابق عظمیٰ طبی معائنے کے لیے اپنی نند کے ساتھ گھر سے نکلی تھی، تاہم بعد ازاں اس کا موبائل فون بند ہو گیا اور اس کے بعد سے وہ لاپتہ رہی۔ شوہر یاسین کے مطابق خاتون کی تلاش کے باوجود کوئی سراغ نہ مل سکا، تاہم آج صبح بابو خوڑ کے علاقے سے اس کی جھلسی ہوئی لاش برآمد ہوئی۔

پولیس نے لاش کو پوسٹ مارٹم کے لیے اسپتال منتقل کر دیا ہے۔ ابتدائی شواہد سے یہ شبہ ظاہر کیا جا رہا ہے کہ خاتون کو زندہ جلایا گیا۔

پولیس حکام کا کہنا ہے کہ واقعے کی مختلف پہلوؤں سے تفتیش کی جا رہی ہے اور جلد ہی حقائق منظر عام پر لائے جائیں گے۔ تاحال قتل کے محرکات اور ملزمان کے حوالے سے کوئی گرفتاری عمل میں نہیں آئی ہے۔