پنجاب حکومت نے صوبے میں غیر قانونی ہاؤسنگ سوسائٹیز کی ریگولرائزیشن کا فیصلہ کر لیا، صوبے میں پہلی مرتبہ ہاؤسنگ سیکٹر کو مکمل طور پر ڈیجیٹلائز کیا جائے گا، ہاؤسنگ سوسائٹی مینجمنٹ سسٹم متعارف کرایا جائے گا۔

وزیراعلیٰ پنجاب مریم نواز کی زیر صدارت اجلاس میں غیرقانونی ہاؤسنگ سوسائٹیز کوریگولرائز کرنےکے میکانزم، ریگولیشن اور ڈیجیٹلائزیشن پرغور کیا گیا۔

مریم نواز نے ہاؤسنگ سوسائٹی کی رجسٹریشن کے لیے درکار غیر ضروری این او سی ختم کرنے کا حکم دیتے ہوئے کہا کہ عوامی سہولت کے لیے پراسیس کو آسان اور مؤثر بنایا جائے۔

اجلاس میں غیر قانونی ہاؤسنگ سوسائٹیز کی ریگولرائزیشن کے لیے اعلیٰ سطح کی کمیٹی تشکیل دینے پر بھی اتفاق کیا گیا، وزیراعلیٰ نے کہا کہ ایسی سکیموں کا مسئلہ جلد از جلد قانون کے مطابق حل کیا جائے تاکہ عوام کو ریلیف فراہم ہو۔

انھوں نے کہا کہ غریب لوگوں سے پیسے لے کر پلاٹ نہ دینا ظلم ہے،غیر قانونی سوسائٹیز کے قیام میں بعض سرکاری محکمے بھی برابر کے ذمہ دار ہیں۔ جو ہاؤسنگ اسکیمیں بن چکی ہیں تو انہیں قواعد و ضوابط کے مطابق ایک مرتبہ ایمنسٹی دینا ہوگی تاکہ مسئلے کا مستقل حل نکل سکے۔