پنجاب پولیس کے رحیم یار خان کچے کے علاقے میں ٹارگٹڈ آپریشن میں پولیس نے ڈاکوؤں سے 3 سالہ مغوی بچہ بحفاظت بازیاب کروا کے اہلخانہ کے حوالے کر دیا۔

ترجمان پنجاب پولیس کے مطابق رحیم یار خان کچہ میں انٹیلیجنس بیسڈ ٹارگٹڈ آپریشن کے دوران ڈاکوؤں سے 3 سالہ مغوی بچہ زین بحفاظت بازیاب کروا لیا گیا۔

ڈی پی او رحیم یار خان عرفان علی سموں نے آپریشن کی قیادت کی، اس دوران پولیس اور کچہ کریمینلز میں فائرنگ کا تبادلہ بھی ہوا جس کے بعد ملزمان پسپائی اختیار کرتے ہوئے فرار ہو گئے۔

بچے کی بازیابی کے بعد ڈی پی او عرفان سموں 3 سالہ زین کو لیکر اس کے گھر پہنچ گئے اور بچہ ورثاء کے حوالے کیا۔ بچے کو دوبارہ پا کر والدین اور اہلخانہ نے پولیس کو دعائیں دیں۔

ڈی پی او عرفان علی سموں کا کہنا تھا کہ پولیس نے 3 سالہ زین کی بازیابی کا چیلنج قبول کیا جس میں اللہ تعالی نے ہمیں سرخرو کیا، پولیس کی موثر کارروائی پر ملزمان بچے کو چھوڑنے پر مجبور ہوئے۔ مفرور ملزمان کو جلد گرفتار کر کے کیفر کردار تک پہنچائیں گے۔