سینیٹ میں اراکین نے بھارتی جارحیت کا منہ توڑ جواب دینے پر افواج پاکستان کو زبردست الفاظ میں خراج تحسین پیش کرتے ہوئے کہا ہے کہ مسلح افواج نے ثابت کر دیا کہ ملک کا دفاع ناقبل تسخیر ہے، اراکین نے اس بات پر زور دیا کہ دشمن کی کسی بھی چال کو ناکام بنانے کے لیے ہمیں تیار رہنا ہوگا۔

سینیٹ اجلاس کی صدارت پیپلزپارٹی کی سینیٹر شیری رحمان نے کی، پاک بھارت جنگ کے دوران دشمن کے دانت کھٹے کرنے اور اس سے درپیش صورتحال پر بحث آج بھی ایوان میں جاری رہی، سینیٹر علی ظفر، سینیٹر عرفان صدیقی، سینیٹر راجا ناصر عباس، سینیٹر عبدالقادر، سینیٹر عون عباس اور دیگر اراکین نے بحث میں حصہ لیا۔

سینیٹر بیرسٹر علی ظفر نے سینیٹ اجلاس سے خطاب کرتے ہوئے کہا کہ ہمیں اپنے دوست ممالک پر فخر ہے جو مشکل وقت میں ہمارے ساتھ کھڑے رہے۔ ہمیں اپنی بہادر افواج اور میڈیا پر ناز ہے جنہوں نے انتہائی پیشہ ورانہ انداز میں دشمن کا مقابلہ کیا۔

سینیٹر بیرسٹر علی ظفر نے کہا کہ مودی کو اپنے رافیل طیاروں اور مہنگے ہتھیاروں پر بڑا غرور تھا، مگر ہماری پاک فضائیہ نے ایک رات میں یہ غرور خاک میں ملا دیا۔ دشمن نے بزدلی کا مظاہرہ کرتے ہوئے رات کے اندھیرے میں حملہ کیا، مگر ہماری افواج کے جواب نے انہیں بوکھلا دیا۔

افواج نے دشمن کو اسی کی زبان میں جواب دے کر عسکری تاریخ کا سنہرا باب رقم کیا، صدر، وزیراعظم

بیرسٹر علی ظفر نے مزید کہا کہ ہم ہندوستان کی طرح شہریوں کو نشانہ نہیں بناتے۔ آج ہم مطالبہ کرتے ہیں کہ بانی پی ٹی آئی کو فوری رہا کیا جائے، کیونکہ جب بات قومی سلامتی کی ہو تو کوئی جماعت نہیں، صرف پاکستان ہوتا ہے۔ ہماری قوم متحد ہے، کوئی بیرونی طاقت ہمیں توڑ نہیں سکتی۔

سینیٹر عرفان صدیقی نے سینیٹ اجلاس سےخطاب کرتے ہوئے کہا کہ بھارتی جارحیت کے جواب میں پاکستانی فتح کا سب سے مثبت پہلو یہ ہے کہ حکومت اور اپوزیشن ایک پیج پر ہیں۔ یہ اتحاد پہلے کبھی دیکھنے میں نہیں آیا۔

عرفان صدیقی نے مزید کہا کہ افواجِ پاکستان نے ثابت کر دیا کہ جنگیں ہتھیاروں سے نہیں بلکہ جذبے سے جیتی جاتی ہیں، اور عوام و پارلیمنٹ کی یکجہتی بے مثال رہی۔

عرفان صدیقی نے کہا کہ بھارت کا ہر ہمسایہ اس کی پالیسیوں سے تنگ ہے، چاہے وہ نیپال ہو، بھوٹان، سری لنکا یا پاکستان۔ بھارت کو پلوامہ واقعے کی شفاف تحقیقات کروانی چاہئیں، وزیراعظم شہباز شریف اس کے لیے تیار ہیں۔

آپریشن بُنْيَانٌ مَّرْصُوْصٌ: معرکہ حق میں تاریخی فتح پر ملک بھر میں آج یوم تشکر منایا جارہا ہے

سینیٹر عرفان صدیقی نے مزید کہا کہ بھارت پاکستان کو کبھی غزہ نہیں بنا سکتا، اور یہ پیغام دشمن کو اچھی طرح مل چکا ہے۔

یوم تشکر : وزیراعلیٰ سندھ کی ’معرکۂ حق‘ ریلی میں شرکت، شہداء کو خراجِ عقیدت

علامہ ناصر عباس نے اجلاس سے خطاب کرتے ہوئے کہا کہ مودی اس خطے کو تباہ کرنا چاہتا تھا لیکن ہماری افواج نے مودی کے اس خواب کومٹی میں ملا دیا۔

سینیٹ اجلاس میں یومِ تشکر کے موقع پر سینیٹر جام سیف اللہ خان نے کہا کہ ہماری افواج نے دشمن کو بہترین انداز میں جواب دیا اور مودی کے رافیل طیاروں کا غرور خاک میں ملا دیا۔انہوں نے سندھ طاس معاہدے کی معطلی کو انسانی حقوق کی خلاف ورزی قرار دیا اور کہا کہ عالمی برادری کو اس کا نوٹس لینا چاہیے۔

سینیٹر عبدالقادر نے ایوان میں اظہار خیال کرتے ہوئے کہا آج ہم یومِ تشکر منا رہے ہیں اور وزیراعظم نے افواجِ پاکستان کو دشمن کو منہ توڑ جواب دینے کا اختیار دیا اور مودی کا گھمنڈ بری طرح چکناچور ہوا۔

سینیٹر عون عباس بپی نے بھی پاک فوج، نیوی اور ایئر فورس کو خراج تحسین پیش کرتے ہوئے کہا کہ دس مئی کی صبح ہم نے دیکھا کہ پوری قوم ایک پیج پر ہے۔ انہوں نے چین، ترکیہ اور آذربائیجان کے پاکستان سے اظہارِ یکجہتی کو سراہا۔

’بنیان مرصوص‘ آپریشن میں تاریخی فتح : پنجاب پولیس کا افواجِ پاکستان کو خراجِ تحسین

سینیٹر حاجی ہدایت اللہ نے اپنے خطاب میں کہا پاکستان نے بھرپور انداز میں بھارت کو جواب دیا، ہمارے گلے شکوے اپنی جگہ لیکن بیرونی حملے پر پوری قوم متحد ہے۔ انہوں نے کہا کہ دشمن کسی بھی وقت حملہ کر سکتا ہے، ہمیں ہمہ وقت تیار رہنا چاہیے۔

ایوان بالا میں مجموعی طور پر قومی یکجہتی اور افواج پاکستان کی شجاعت کو خراجِ تحسین پیش کیا گیا، اور یہ پیغام دیا گیا کہ پاکستان ہر جارحیت کا منہ توڑ جواب دینے کی مکمل صلاحیت رکھتا ہے۔