سندھ حکومت نے ماحولیاتی آلودگی کے خاتمے کے لیے اہم قدم اٹھاتے ہوئے صوبے بھر میں 15 جون سے ہر قسم کے پلاسٹک شاپنگ بیگز پر مکمل پابندی عائد کرنے کا فیصلہ کر لیا ہے۔ اس حوالے سے محکمہ ماحولیات، موسمیاتی تبدیلی و ساحلی ترقی کی جانب سے نوٹیفکیشن بھی جاری کر دیا گیا ہے۔

نوٹیفکیشن کے مطابق پابندی کا اطلاق نان ڈیگریڈیبل، اوکسو ڈیگریڈیبل، بلیک اور ری سائیکلڈ پلاسٹک بیگز پر بھی ہوگا۔ 2019 میں جزوی پابندی کے بعد یہ پہلا موقع ہے کہ پلاسٹک بیگز پر مکمل بین عائد کیا جا رہا ہے۔ یہ اقدام سندھ پروہیبیشن آف نان ڈیگریڈیبل پلاسٹک پروڈکٹس رولز 2014 میں ترمیم کے تحت کیا گیا ہے۔

سیکریٹری ماحولیات آغا شاہنواز نے واضح کیا ہے کہ صرف ماحول دوست بیگز کے استعمال کی اجازت ہوگی، اور اس پالیسی پر مکمل عملدرآمد یقینی بنایا جائے گا۔ انہوں نے کہا کہ پلاسٹک بیگز ماحولیاتی تباہی کی بنیاد ہیں اب صرف اعلان نہیں بلکہ زیرو ٹالرنس کے تحت سخت کارروائی ہوگی۔

محکمہ ماحولیات نے عوام سے اس فیصلے پر تعاون کی اپیل کرتے ہوئے ماحولیاتی تحفظ کو قومی ذمہ داری قرار دیا ہے۔