پنجاب یونیورسٹی کے سکیورٹی گارڈز پر طلبہ تنظیم کے کارکنوں نے گیٹ پر شناخت طلب کرنے پر حملہ کر دیا، جس کے نتیجے میں دو سکیورٹی اہلکار زخمی ہو گئے۔ ترجمان جامعہ کے مطابق واقعہ اس وقت پیش آیا جب گیٹ پر معمول کی چیکنگ کے دوران گارڈز نے ضہیب فخری اور ناظم حماد رضا سے شناخت طلب کی۔

ترجمان کے مطابق حملہ کرنے والوں میں تنظیم کے کارکن زین سرفراز، غضنفر علی، محمد انیس، شمریز ممتاز، زین شوکت، سمیع اللہ، عثمان احمد اور حماد رضا شامل ہیں۔ ان میں سے زیادہ تر طلبہ تنظیم سے منسلک افراد یونیورسٹی سے خارج شدہ ہیں۔

ترجمان جامعہ نے واضح کیا ہے کہ آئندہ اگر کوئی خارج شدہ کارکن یونیورسٹی حدود میں پایا گیا تو اسے فوراً پولیس کے حوالے کیا جائے گا۔

ترجمان نے مزید کہا کہ یونیورسٹی میں سکیورٹی کو یقینی بنانے کے لیے گیٹس پر معمول کے مطابق سخت چیکنگ جاری رہے گی۔