اسلام آباد ہائی کورٹ نے واضح کیا ہے کہ عدالت میں زیر التوا سزا کے خلاف اپیلیں صرف اپنے نمبر اور باری پر ہی سماعت کے لیے مقرر ہوں گی۔ اس حوالے سے بانی پی ٹی آئی کی 190 ملین پاؤنڈ کیس میں سزا کے خلاف اپیل اس سال سماعت کے لیے مقرر ہونے کے امکانات نہ ہونے کے برابر ہیں۔

عدالت میں جمع کرائی گئی رجسٹرار آفس کی تحریری رپورٹ کے مطابق نیشنل جوڈیشل پالیسی میکنگ کمیٹی کے فیصلوں کی روشنی میں پالیسی مرتب کی گئی ہے جس کے تحت اپیلیں صرف باری اور تسلسل سے مقرر کی جا رہی ہیں۔

رپورٹ کے مطابق اسلام آباد ہائیکورٹ میں اس وقت 279 سزا یافتہ مجرموں کی اپیلیں زیر التوا ہیں جن میں 63 اپیلیں سزائے موت کے خلاف،73 اپیلیں عمر قید کے خلاف، 88 اپیلیں سات سال سے زائد قید اور 55 اپیلیں سات سال سے کم قید کی سزاؤں کے خلاف شامل ہیں۔

رجسٹرار آفس کے مطابق سب سے پرانی سزائے موت کی اپیل 2017 کی ہے جبکہ بانی پی ٹی آئی کی اپیل 31 جنوری 2025 کو دائر ہوئی تھی اور ابھی موشن اسٹیج پر ہے۔ رپورٹ میں کہا گیا ہے کہ پہلے اس اپیل کی پیپر بکس تیار ہوں گی اس کے بعد یہ اپنی باری پر فہرست میں شامل ہو گی۔

190 ملین پاؤنڈ کیس کا فیصلہ سنا دیا گیا، عمران خان کو 14 سال اور بشریٰ بی بی کو 7 سال قید کی سزا

رجسٹرار آفس نے واضح کیا کہ 2025 کے دوران بھی اس اپیل کے سماعت کے لیے مقرر ہونے کا امکان نہیں ہے کیونکہ اپیلوں کا تعین فکسیشن پالیسی کے مطابق پرانے مقدمات کی بنیاد پر کیا جاتا ہے۔

یہ پیش رفت ایسے وقت پر سامنے آئی ہے جب بانی پی ٹی آئی کی قانونی ٹیم ان کی رہائی اور مقدمات کی جلد سماعت کے لیے کوشاں ہے، مگر عدالتی پالیسی ان کوششوں کی راہ میں ایک بڑی رکاوٹ بن رہی ہے۔