محکمہ موسمیات کے مطابق ملک کے بیشتر علاقوں میں آج سے 30 مئی تک گرمی کی شدت میں نمایاں اضافہ متوقع ہے، جبکہ سندھ، پنجاب اور بلوچستان شدید گرمی کی لپیٹ میں رہیں گے اور درجہ حرارت معمول سے 5 سے 7 ڈگری سینٹی گریڈ تک زیادہ رہنے کا امکان ظاہر کیا گیا ہے۔

محکمہ موسمیات کے مطابق جنوبی علاقوں میں آج سے یکم مئی تک شدید گرمی کا سلسلہ جاری رہے گا جبکہ بالائی پنجاب، خیبرپختونخوا، آزاد کشمیر، گلگت بلتستان اور اسلام آباد میں بھی درجہ حرارت معمول سے 4 سے 6 ڈگری سینٹی گریڈ زیادہ رہنے کا امکان ہے۔

ادھر نیشنل ڈیزاسٹر مینجمنٹ اتھارٹی (این ڈی ایم اے) نے بھی شدید موسمی حالات کے پیش نظر الرٹ جاری کردیا ہے۔ رپورٹ کے مطابق یکم مئی سے موسم میں تبدیلی آئے گی اور یکم سے 7 مئی کے دوران ملک کے بیشتر حصوں میں تیز ہواؤں، آندھی، گرج چمک کے ساتھ بارش اور بعض مقامات پر ژالہ باری کا امکان ہے۔

کراچی میں ایک بار پھر شدید گرمی کی لہر کی پیشگوئی

خیبرپختونخوا، گلگت بلتستان، آزاد کشمیر اور پنجاب میں شدید ہواؤں اور بارشوں کے باعث نشیبی علاقوں میں سیلابی صورتحال اور پہاڑی علاقوں میں لینڈ سلائیڈنگ کا خدشہ بھی ظاہر کیا گیا ہے۔

محکمہ موسمیات اور این ڈی ایم اے نے عوام سے احتیاطی تدابیر اختیار کرنے کی اپیل کی ہے تاکہ ممکنہ جانی و مالی نقصان سے بچا جا سکے۔