کراچی کے علاقے ڈیفنس میں ایک خاتون کی جانب سے پولیس اہلکاروں سے تلخ کلامی اور دھمکیاں دینے کی ویڈیو وائرل ہوئی ہے۔ واقعہ اس وقت پیش آیا جب پولیس نے خاتون کی گاڑی سے کالے شیشے اتارنے کی کوشش کی۔

ویڈیو میں خاتون کو یہ کہتے سنا جا سکتا ہے کہ وہ ایک سال سے کالے شیشے والی گاڑی چلا رہی ہیں اور پولیس اہلکاروں کو مخاطب کرتے ہوئے کہہ رہی ہیں کہ ’تم سب بکے ہوئے ہو، درخشاں اور ساحل تھانے والوں سے پوچھو۔‘

پولیس حکام کے مطابق، خاتون کی گاڑی کے کالے شیشے ہٹا دیے گئے ہیں۔ گاڑی شیر بہادر خان کے نام پر رجسٹرڈ ہے اور اس کا پتہ شادمان نارتھ ناظم آباد درج ہے۔

حکام کا کہنا ہے کہ خاتون کے رویے اور پولیس کو دھمکیاں دینے کے معاملے کا جائزہ لیا جا رہا ہے اور مزید قانونی کارروائی پر غور کیا جا رہا ہے۔