خیبر پختونخوا سے رواں سال کا پہلا منکی پاکس (ایم پاکس) کا کیس رپورٹ ہوا ہے۔ دبئی سے آنے والے 35 سالہ شخص میں ایم پاکس کی تصدیق ہوئی ہے۔ متاثرہ شخص کو پولیس سروسز اسپتال منتقل کردیا گیا ہے، صوبے میں اب تک ایم پاکس کے 10 کیسز رپورٹ ہوئے ہیں۔

مشیر صحت خیبر پختونخوا احتشام علی کے مطابق دبئی سے پشاور آنے والے شخص میں منکی پاکس کی تصدیق ہوئی ہے۔

مشیر صحت کے مطابق پولیس ہسپتال سے مریض کے نمونے پبلک ہیلتھ ریفرنس لیب بھیجے گئے تھے، پبلک ہیلتھ ریفرنس لیب نے دبئی سے آنے والے 35 سالہ شخص میں ایم پاکس کی تصدیق کی، جس کے بعد ایم پاکس متاثرہ شخص کو پولیس سروس اسپتال پشاور منتقل کر دیا گیا ہے۔

احتشام علی کے مطابق پشاور ائیرپورٹ مینیجر کو مریض کے آس پاس کے مسافروں کی تفصیلات فراہم کرنے کیلئے خط ارسال کردیا ہے، مسافروں کی معلومات ملتے ہی متعلقہ ڈی ایچ اوز کو کنٹیکٹ ٹریسنگ کیلئے مطلع کیا جائے گا۔

انہوں نے بتایا کہ خیبر پختونخوا میں اب تک ایم پاکس کے 10 کیسز رپورٹ ہوئے ہیں، جن میں 2023 میں 2 ، 2024 میں 7 اور رواں سال کا یہ پہلا کیس رپورٹ ہوا ہے۔

مشیر صحت احتشام علی نے عوام کو سماجی فاصولں کو یقینی بنانے اور محتاط رہنے کی ہدایات کی ہیں۔