لاہور ہائیکورٹ نے پنجاب حکومت کو واٹر ایمرجنسی لگانے کی تجویز دے دی۔

ذرائع کے مطابق عدالت نے ریمارکس دیے کہ زیر زمین پانی کی سطح کم ہوتی جا رہی ہے، اگر اس سال برف باری نہ ہوئی تو الارمنگ صورتحال پیدا ہو جائے گی۔

لاہور ہائیکورٹ کے جسٹس شاہد کریم نے سموگ کے تدراک کے حوالے سے دائر درخواستوں پر سماعت کی۔ دوران سماعت مختلف محکموں کی جانب سے رپورٹس جمع کرائی گئیں۔

واسا کے وکیل نے بتایا کہ واٹر میٹر کے حوالے سے کام کر رہے ہیں، پہلے مرحلے میں کمرشل عمارتوں پر واٹر میٹر لگیں گے۔ دوسرے مرحلے میں ڈومیسٹک سطح پر واٹر میٹر لگیں گے۔

ممبر جوڈیشل کمیشن نے بتایا کہ کار شو رومز میں روزانہ سینکڑوں گاڑیاں دھلتی ہیں۔ عدالت نے ریمارکس دیے کہ کار شو رومز بہت زیادہ پانی استعمال کرتے ہیں انکا ٹیرف بڑھائیں۔ ہم کتنے عرصے سے بول رہے ہیں کہ دس مرلے یا اس سے اوپر کوئی ایسا گھر نہیں بنے گا جس میں واٹر ریسائیکلنگ پلانٹ نہ ہو۔

سپریم کورٹ کے ایڈیشنل رجسٹرار جوڈیشل نے توہین عدالت کا نوٹس چیلنج کردیا

دوران سماعت عدالت نے سموگ پر قابو پانے کے لیے حکومتی اقدامات کی تعریف کی اور کہا حکومت اور اداروں نے بہت اچھا کام کیا ہے۔ ممبر جوڈیشل کمیشن نے بتایا کہ ٹرسٹ اسکول بچوں کو ٹرانسپورٹ فراہم کرنے کا 9 ہزار روپیہ لے رہا ہے۔ عدالت نے ریمارکس دیے کہ بڑے اسکولز کو ٹارگٹ کریں اور ان سے شروع کریں۔ ایچیسن کو بتائیں کہ انکے پچاس فیصد بچے کم از کم بسز پر آئیں گے۔

ممبر جوڈیشل کمیشن نے بتایا کہ تین سکولز کا سروے کیا جو کہ بسز کے لیئے دو ہزار سے دس ہزار روپے تک چارج کر رہے ہیں۔ ممبر جوڈیشل کمیشن نے بتایا کہ فورسٹ ڈیپارٹمنٹ نے مانگا منڈی کے قریب چھ سو ایکڑ جگہ روڈا کو دے رکھی ہے۔ وہاں پر روڈا نے پلانٹیشن کرنی تھی، ابھی تک ایک درخت نہیں لگا۔

عدالت نے آئندہ سماعت پر مختلف محکموں سے رپورٹس طلب کرتے ہوئے کارروائی آئندہ ہفتے تک ملتوی کردی۔