خیبرپختونخوا کے مشیر اطلاعات بیرسٹر سیف نے کہا ہے کہ القادر ٹرسٹ کیس جعلی حکومت کا جعلی مقدمہ ہے، امید ہے کہ آج فیصلہ مزید مؤخر نہیں ہوگا، 3 بار فیصلہ مؤخر ہونے سے پہلے ہی شکوک و شبہات نے جنم لے لیا ہے، انصاف میں تاخیر انصاف سے انکار کے مترادف ہے۔

اپنے ایک بیان میں مشیر اطلاعات خیبر پختونخوا بیرسٹر سیف کا کہنا تھا کہ امید ہے کہ آج القادر ٹرسٹ کیس کا فیصلہ مزید مؤخر نہیں ہوگا، پہلے ہی 3 بار فیصلہ مؤخر ہونے سے شکوک و شبہات نے جنم لے لیا ہے۔

بیرسٹر سیف نے کہا کہ القادر ٹرسٹ کیس جعلی حکومت کا جعلی مقدمہ ہے، القادر کیس میں پیسہ بیرون ملک سے آیا اوراسے ریاست کے فلاحی منصوبے پر خرچ کیا گیا۔

190 ملین پاؤنڈ کیس میں عمران خان کو سزا ہوگی یا نہیں؟ فیصلہ آج سنائے جانے کا امکان

انہوں نے مزید کہا کہ بانی پی ٹی آئی عمران خان یا بشریٰ بی بی کے اکاؤنٹ میں کوئی رقم منتقل نہیں ہوئی، عمران خان کے خلاف تمام جعلی مقدمات کی حقیقت عدالتوں میں بے نقاب ہو رہی ہے، انصاف میں تاخیر انصاف سے انکار کے مترادف ہے۔

مشیر اطلاعات خیبرپختونخوا کا کہنا تھا کہ نوجوانوں کو سیرت النبیﷺ سے روشناس کرانے پر حکومت بانی پی ٹی آئی کو سزا دینے کی کوشش کر رہی ہے، نوجوانوں کو سیرت النبیﷺ سے روشناس کرانا جرم ہے تو یہ جرم عمران خان کرتا رہے گا، حکومت نے ملک میں لاقانونیت کے نئے ریکارڈ قائم کیے ہیں۔