بچوں کے عالمی دن کے موقع پر چائلڈ پروٹیکشن انسٹی ٹیوٹ (CPI) نیشنل ڈیٹا بیس اینڈ رجسٹریشن اتھارٹی (نادرا) اور مشعل اسکول کے اشتراک سے بری امام اسلام آباد میں 100 سے زائد بچوں کا قانونی اندراج مکمل کر لیا گیا۔

سی پی آئی ڈائریکٹر جنرل نے تقریب سے خطاب کرتے ہوئے کہا کہ بچوں کا پیدائشی اندراج نہ صرف قانونی تقاضا ہے بلکہ ان کی شناخت، تعلیم، صحت اور تحفظ جیسے بنیادی حقوق فراہم کرتا ہے۔ انہوں نے مہم کو اجتماعی عزم کی کامیابی قرار دیا۔

نادرا نے اسلام آباد کے دور دراز اور پسماندہ علاقوں میں موبائل رجسٹریشن وین کے ذریعے پیدائشی اندراج کا سلسلہ شروع کیا ہے تاکہ دیہی بچوں کو اس اہم خدمت تک آسان رسائی مل سکے اور انہیں کسی قسم کی لوجسٹک رکاوٹ کا سامنا نہ ہو۔

مہم 10 دسمبر 2024 تک جاری رہے گی اور 16 دن کی ایکٹیوزم مہم کا حصہ ہے، جس کا مقصد پسماندہ برادریوں کو رجسٹریشن کی خدمات فراہم کرنا اور ان کی شمولیت کو یقینی بنانا ہے۔

تاہم والدین کو یونین کونسل کی سطح پر کئی مسائل کا سامنا ہے، جنہیں فوری حل کرنے کی ضرورت ہے، حکومت اور کمیونٹی شراکت داروں کی یہ مشترکہ کوششیں ان بچوں کے محفوظ مستقبل کی تعمیر کی جانب اہم قدم ہیں۔

واضح رہے کہ 20 نومبر کو بچوں کا عالمی دن منایا جاتا ہے، جس کا مقصد دنیا بھر میں بچوں کے حقوق کے تحفظ اور ان کے معیار زندگی کو بہتر بنانا ہے، اقوام متحدہ نے پہلی بار 1954 میں اس دن کو منانے کا اعلان کیا تھا ۔

1989 میں اقوام متحدہ کی جنرل اسمبلی میں بچوں کے حقوق کا عالمی کنونشن منظور کیا گیا، جو اس دن کی اہمیت کو مزید اجاگر کرتا ہے۔ اس دن کا مقصد بچوں کی تعلیم، صحت، تحفظ اور بہتر ماحول کی فراہمی کو یقینی بنانا ہے۔

یہ دن بچوں کی عزت افزائی اور حوصلہ بڑھانے کے ساتھ ساتھ دنیا بھر میں تشدد اور دیگر چیلنجز کے خلاف آگاہی پیدا کرنے کا موقع فراہم کرتا ہے۔