امریکی ریاست کیلیفورنیا کے ایک شخص نے وہ لمحہ ویڈیو کے ذریعے محفوظ کرلیا جب سمندر میں ایک قاتل وھیل نے اُسے قوسِ قزح کا تحفہ دیا۔

وھیلز عام طور پر بہت پُرسکون مزاج کی حامل ہوتی ہیں۔ وہ جب کسی جہاز یا کشتی کے نزدیک آتی ہیں تو اپنے دوستانہ مزاج کا مظاہرہ کرنے کے لیے گہرا سانس لے کر پانی کی اچھی خاصی مقدار اُڑاتی ہیں۔ یہ منظر انتہائی دیدہ زیب ہوتا ہے۔

وائلڈ اورکا نامی یہ وھیل عرفِ عام میں کِلر وھیل کہلاتی ہے۔ ڈومینک بایاگِنی نے کِلر وھیل کی ناک سے بلند ہونے والے پانی سے بننے والی قوسِ قزح کا خوبصورت منظر اپنے کیمرے میں محفوظ کرکے انسٹا گرام پر اپ لوڈ کیا ہے۔ اس ویڈیو کو 20 لاکھ سے زائد افراد دیکھ چکے ہیں۔

ڈومینک بایاگنی وائلڈ لائف فوٹوگرافر اور وھیل واچر ہے۔ اُس کا کہنا تھا کہ وھیل بجائے خود کم دل کش نظارہ نہ تھی۔ اس پر قوسِ قزح کا تحفہ۔ یہ تو کمال ہی ہوگیا۔ یہ نظارہ اُس نے سان ڈیاگو کے پانیوں میں فلم بند کیا۔