کرک کے علاقے گرگری کی امان کوٹ میں دہشت گردوں نے پولیس موبائل پر حملہ کر دیا، جس کے نتیجے میں پانچ پولیس اہلکار موقع پر شہید ہو گئے۔ پولیس کے مطابق حملہ سورکمر کے مقام پر معمول کے گشت کے دوران کیا گیا۔

شہید ہونے والے اہلکاروں کی میتیں سول اسپتال منتقل کر دی گئی ہیں۔ شہدا میں شاہد اقبال، صفدر، عارف، سمیع اور محمد ابرار شامل ہیں۔

پولیس نے علاقے کے حساس مقامات پر مزید گشت بڑھا دیا اور حملے میں ملوث افراد کی تلاش کے لیے کارروائیاں تیز کیں، پولیس اور سی ٹی ڈی کے مشترکہ آپریشن میں دریش خیل میں کالعدم تحریک کے آٹھ مسلح افراد مقابلے میں مارے گئے۔

ڈی پی او سعود خان کا کہنا تھا کہ اپنے شہید پولیس اہلکاروں کا بدلہ ہر صورت لیں گے، شہیدوں کا خون رائیگاں نہیں جانے دیں گے، انھوں نے کہا کہ قیام امن کے لئے کسی بھی قربانی سے دریغ نہیں کرینگے۔ بزدلانہ کاروائیوں سے پولیس کے حوصلے پست نہیں ہوں گے۔

گورنر خیبرپختونخوا فیصل کریم کنڈی نے پولیس موبائل پر ہونے والے حملے کی شدید مذمت کی اور واقعے پر گہرے افسوس کا اظہار کرتے ہوئے شہید اہلکاروں کو خراج عقیدت پیش کیا اور ان کے لواحقین کے ساتھ دلی ہمدردی اور تعزیت کا اظہار کیا۔

گورنر نے کہا کہ پولیس موبائل پر حملہ انتہائی افسوسناک اور انسانیت دشمن اقدام ہے اور اہلکاروں کو نشانہ بنانے والے کسی رعایت کے مستحق نہیں ہیں۔

انہوں نے مزید کہا کہ قیام امن کے لیے پولیس اہلکاروں کی قربانیاں رائیگاں نہیں جائیں گی اور حکومت و سیکیورٹی ادارے اس قسم کے دہشت گردانہ حملوں کے خلاف بھرپور کارروائی جاری رکھیں گے۔