ایران نے پاکستان اور افغان طالبان کے درمیان ثالثی و مصالحت کی پیشکش کردی، یہ پیشکش ایرانی وزیر خارجہ نے اپنے پاکستانی ہم منصب اسحاق ڈار سے ٹیلی فونک رابطے میں کی۔

ایرانی میڈیا کے مطابق ایرانی وزیرِ خارجہ سید عباس عراقچی نے نائب وزیرِ اعظم و وزیرِ خارجہ اسحاق ڈار سے ٹیلی فون رابطہ کیا اور کہا کہ ایران مصالحت کے لیے ہر ممکن مدد کو تیار ہے۔

ٹیلی فون پر اسحاق ڈار اور ایرانی وزیر خارجہ نے دوطرفہ تعلقات، علاقائی اوربین الاقوامی امورپرتبادلہ خیال کیا۔

سید عباس عراقچی نے پاکستان اورافغان طالبان کے درمیان ثالثی ومصالحت کی پیشکش کی اور دونوں ممالک کے قدیم اور دوستانہ تعلقات کی اہمیت پر زور دیتے ہوئے کہا کہ ایران مختلف شعبوں میں تعلقات کو فروغ دینے کا خواہاں ہے۔

اس موقع پر ایران کی جانب سے افغانستان اور پاکستان کے درمیان کشیدگی پر تشویش کا اظہار بھی کیا گیا۔

ایرانی وزیرخارجہ نے زور دیا کہ دونوں ممالک کوبات چیت جاری رکھنی چاہیے تاکہ پاکستان اور افغانستان کے باہمی اختلافات دور ہوں اور تناؤ میں کمی آئے۔

استنبول مذاکرات پر غیرجانبدار ممالک نے پاکستان کے مؤقف کی تائید کی: سفارتی ذرائع

سید عباس عراقچی نے مزید کہا کہ ایران ہر ممکن مدد کے لیے تیار ہے تاکہ دونوں ممالک کے درمیان امن و مصالحت قائم ہو سکے۔

نائب وزیراعظم اسحاق ڈار نے افغانستان کے ساتھ حالیہ مذاکرات اور موجودہ حالات پر روشنی ڈالی اور کہا علاقائی امن و استحکام کا برقرار رہنا نہایت اہم ہے۔ دونوں فریقوں نے اس معاملے پر رابطے اور مشاورت جاری رکھنے پر اتفاق کیا۔