اسرائیلی سفیر کے قتل کا ایرانی منصوبہ ناکام بنا دیا گیا: امریکی حکام
امریکی حکام نے انکشاف کیا ہے کہ ایران کی پاسدارانِ انقلاب نے میکسیکو میں اسرائیل کی سفیر عینات کرانز نائیگر کو قتل کرنے کا منصوبہ بنایا تھا، تاہم یہ سازش ناکام بنا دی گئی ہے اور فی الحال کوئی خطرہ موجود نہیں۔ دوسری جانب میکسیکو کی حکومت کا کہنا ہے کہ اسے اس مبینہ حملے کے بارے میں کوئی اطلاع نہیں ملی۔
خبر رساں ادارے رائٹرز کے مطابق امریکی اہلکار نے، نام ظاہر نہ کرنے کی شرط پر، بتایا کہ اسرائیلی سفیر پر حملے کی یہ سازش گزشتہ سال کے آخر میں شروع ہوئی اور رواں سال کے پہلے چھ ماہ تک فعال رہی۔
اہلکار نے خبر رساں ادارے رائٹرز کو بتایا: “یہ منصوبہ قابو میں لے لیا گیا ہے اور فی الحال کوئی خطرہ موجود نہیں۔ یہ ایران کی اُس طویل تاریخ کا حصہ ہے جس میں وہ اپنے مخالفین، سفارت کاروں، صحافیوں اور منحرفین کو نشانہ بناتا رہا ہے — اور یہ معاملہ ہر اُس ملک کے لیے باعثِ تشویش ہونا چاہیے جہاں ایران کا اثر و رسوخ ہے۔”