آئی سی سی ٹی 20 ورلڈ کپ 2026 کے فائنل کے لیے احمد آباد کے نریندرا مودی کرکٹ اسٹیڈیم کو شارٹ لسٹ کر لیا گیا ہے اور توقع ہے کہ آئی سی سی آئندہ چند دنوں میں ٹورنامنٹ کے شیڈول کا باضابطہ اعلان کرے گا۔

بھارتی خبر رساں ادارے دی انڈین ایکسپریس کے مطابق آئی سی سی ٹی 20 ورلڈ کپ بھارت اور سری لنکا کی مشترکہ میزبانی میں 7 فروری سے 8 مارچ تک منعقد ہوگا اور اس حوالے سے دنیا کے سب سے بڑے کرکٹ اسٹیڈیم نریندرا مودی اسٹیڈیم احمد آباد کو میگا ایونٹ کے فائنل کی میزبانی کے مضبوط امیدوار کے طور پر شارٹ لسٹ کر لیا گیا ہے۔

توقع ہے کہ آئی سی سی آئندہ چند دنوں میں ٹورنامنٹ کے مکمل شیڈول اور وینیوز کا باضابطہ اعلان کرے گا۔

بورد آف کنٹرول فار کرکٹ ان انڈیا (بی سی سی آئی) کے اعلیٰ حکام کی حالیہ میٹنگ میں فیصلہ کیا گیا کہ اس بار ٹی 20 ورلڈ کپ 2023 میں ہونے والے ون ڈے ورلڈ کپ کے مقابلے کم شہروں میں کھیلا جائے گا جب کہ ہر میزبان شہر میں کم از کم 6 میچز ہوں گے۔

ذرائع کے مطابق، بھارت نے ٹی 20 ورلڈ کپ کے لیے احمد آباد، دہلی، کولکتہ، چنئی اور ممبئی کو میزبانی کے لیے شارٹ لسٹ کیا ہے۔ ساتھ ہی سری لنکا کے تین اسٹیڈیمز میں بھی میچز کرانے کی منصوبہ بندی کی گئی ہے تاہم ان مقامات کا حتمی انتخاب باقی ہے۔

یہ بھی واضح نہیں ہے کہ بنگلورو اور لکھنؤ کو میچز کی میزبانی کے لیے شامل کیا جائے گا یا نہیں کیوں کہ بھارت سری لنکا کے ساتھ مل کر ٹورنامنٹ کی میزبانی کر رہا ہے۔

بی سی سی آئی نے طے کیا ہے کہ وہ اسٹیڈیمز جہاں آئی سی سی ویمنز 50 اوور ورلڈ کپ کے میچز ہوئے تھے، جن میں گوہاٹی، وشاکھاپٹنم، اندور اور نوی ممبئی شامل ہیں، اس بار مردوں کے میگا ایونٹ کے لیے زیر غور نہیں آئیں گے۔