عالمی مالیاتی فنڈ (آئی ایم ایف) نے وفاقی حکومت کو نئے نیشنل فنانس کمیشن (این ایف سی) ایوارڈ میں تکنیکی معاونت کی پیشکش کردی ہے۔

ذرائع کے مطابق وفاق اور صوبوں کے درمیان وسائل کی تقسیم کا نیا فارمولا تیار کرنے کی کوششوں کی تناظر میں آئی ایم ایف نے بھی حکومت کو تیکنیکی معاونت کی پیشکش کردی۔ نئے این ایف سی فارمولے میں آبادی کا حصہ کم اور تعلیم، صحت اور ٹیکس وصولی جیسے عوامل شامل کرنے پر غور کیا جارہا ہے۔

حکام وزارت خزانہ کے مطابق آئی ایم ایف کے ساتھ ابھی این ایف سی پر باقاعدہ مشاورت نہیں ہوئی، ابھی یہ کہنا قبل از وقت ہے کہ نیا این ایف سی کا فارمولا کیا ہوگا تاہم نیا این ایف سی فارمولا طویل المدتی قومی مفاد کومدنظر رکھ کر طے کیا جائے گا، این ایف سی فارمولے میں تبدیلی کی ضرورت پر غور جاری ہے۔این ایف سی کمیشن کے اجلاس کے لیے 18 نومبر کی تاریخ تجویز کی گئی ہے۔

حکام وزارت خزانہ کا کہنا ہے کہ ملک میں کئی آبادیاتی و ساختی تبدیلیاں واقع ہو چکی ہیں، وفاق اور صوبوں کے درمیان فارمولے پر ازسرنو مشاورت کی تجویز زیرغور ہے، مجوزہ نئے این ایف سی ایوارڈ میں آبادی کا حصہ 82 فیصد سے کم کرنے کی تجویز ہے۔

وفاقی اور صوبوں کے درمیان وسائل کی تقسیم میں تعلیم، صحت اور ٹیکس وصولی جیسے عوامل شامل کرنے پر غور جاری ہے۔ 24 کروڑ 15 لاکھ سے زائد آبادی کو نئے فارمولے کی بنیاد بنانے کی تجویز ہے۔ کارکردگی اور ماحولیاتی اقدامات پر وسائل کی تقسیم کا نیا فارمولا بھی زیرغور ہے۔ وفاق اور صوبوں کے مالی اختیارات کی ازسرنو وضاحت کی جائے گی۔