کراچی میں ڈمپر ایسوسی ایشن کے صدر کے گن مین کی فائرنگ کے واقعے نے شہر میں ہلچل مچا دی۔ پولیس کے مطابق فائرنگ کرنے والے گن مین معراج کو گرفتار کر کے اسلحہ بھی برآمد کر لیا گیا ہے، جبکہ ایسوسی ایشن کے صدر لیاقت محسود کی گرفتاری کے لیے چھاپے مارے جا رہے ہیں۔

پیر کی شب کراچی کے علاقے گارڈن میں ڈمپر کی ٹکر سے شاہزیب نامی نوجوان جاں بحق جبکہ اس کی اہلیہ زخمی ہو گئی تھیں۔ حادثے کے بعد مشتعل شہریوں نے ڈمپر کو آگ لگا دی تھی، جبکہ ڈرائیور کو پولیس نے موقع پر گرفتار کر لیا تھا۔ اس واقعے کے بعد پولیس نے ڈمپر ایسوسی ایشن کے سربراہ لیاقت محسود کے خلاف مقدمہ درج کر کے تحقیقات شروع کی تھیں۔

ذرائع کے مطابق لیاقت محسود نے عدالت سے ضمانت قبل از گرفتاری کے لیے درخواست دائر کی تھی، جس پر عدالت نے منگل کو سماعت کے بعد پچاس ہزار روپے کے ضمانتی مچلکوں کے عوض ان کی ضمانت منظور کر لی۔ عدالت نے ساتھ ہی ہدایت کی کہ لیاقت محسود تفتیش کے دوران پولیس کے سامنے پیش ہوں۔

واقعے کی ایک اہم کڑی وہ تھی جب لیاقت محسود پیر کی شب اپنے مسلح گارڈ کے ہمراہ جائے حادثہ پر پہنچے۔ عینی شاہدین کے مطابق ان کی آمد پر شہریوں نے شدید احتجاج کیا اور انصاف کا مطالبہ کیا۔ اسی دوران ان کے گارڈ نے ہوائی فائرنگ کی، جس سے علاقے میں خوف و ہراس پھیل گیا۔ پولیس کے مطابق بعد ازاں فائرنگ کرنے والا گارڈ موقع سے فرار ہو گیا تھا۔