کراچی کے مختلف علاقوں میں آج صبح سے ہلکی بوندا باندی کا سلسلہ وقفے وقفے سے جاری ہے۔ ٹھنڈی ہوائیں چلنے سے شہر کا موسم خوش گوار ہوگیا ہے۔

شاہراہ فیصل، نرسری، طارق روڈ پر بوندا باندی ہوئی ہے۔ بہادرآباد، گلشن اقبال، صدر، ایم اے جناح روڈ، گرومندر، جمشید روڈ پر بھی ہلکی بارش دیکھنے کو ملی ہے۔

سولجربازار،گلستان جوہر، لیاقت آباد و دیگر علاقوں میں بھی بوندا باندی ہوئی ہے۔

چیف میٹرولوجسٹ امیر حیدر کے مطابق کراچی میں مون سون کا اسپیل ختم ہو چکا ہے اور فی الحال صرف سمندری ہواؤں (سی بریز) کے باعث مقامی بادل بن رہے ہیں، جس کے نتیجے میں 2 سے 4 ملی میٹر تک ہلکی بارش ہو سکتی ہے۔

چیف میٹرولوجسٹ امیر حیدر کا کہنا ہے کہ شہری اطمینان رکھیں، کراچی میں مون سون کا کوئی نیا اسپیل نہیں آ رہا۔ یہ صرف لوکل سسٹم کی بارش ہے جو کل تک جاری رہ سکتی ہے۔

محکمہ موسمیات کے مطابق موجودہ بارشوں کی شدت معمولی ہے اور 4 ملی میٹر سے زائد بارش کا امکان نہیں۔ شہریوں کو احتیاطی تدابیر اپنانے اور غیر ضروری افواہوں سے گریز کی ہدایت کی گئی ہے۔