پاکستان تحریک انصاف (پی ٹی آئی) کے بانی چیئرمین عمران خان کے بیٹوں سلیمان اور قاسم نے پاکستان آنے کے لیے ویزوں کی درخواست دے دی ہے۔

تفصیلات کے مطابق سابق وزیراعظم عمران خان کی ہمشیرہ علیمہ خان نے بتایا ہے کہ سلیمان اور قاسم نے ویزوں کی درخواست دے دی ہے، حکومت بانی پی ٹی آئی کے بیٹوں کو پاکستان آنے سے نہیں روک سکتی۔

علیمہ خان نے بتایا کہ برٹش پاسپورٹ پر دونوں نے ویزے کے لیے اپلائی کردیا ہے، قاسم اور سلیمان کے پاس نائیکوپ کارڈ نہیں ہے۔

یاد رہے کہ عمران خان کے بیٹے ، 28 سالہ سلیمان خان اور 26 سالہ قاسم خان نے پہلی مرتبہ مئی میں اپنے والد کی قید پر عوامی طور پر توجہ دلانے کے لیے آواز بلند کی تھی۔ گزشتہ ماہ علیمہ خان نے کہا تھا کہ عمران خان کی رہائی کی مہم کے تحت دونوں بیٹے امریکا جائیں گے اور پھر پاکستان آئیں گے، دونوں بھائی پھر امریکا گئے اور وہاں امریکی قانون سازوں سے اپنے والد کی قید کے معاملے پر ملاقاتیں کیں۔

عمران خان اگست 2023 سے قید میں ہیں اور اس وقت اڈیالہ جیل میں 190 ملین پاؤنڈ کرپشن کیس میں سزا کاٹ رہے ہیں، ان پر 9 مئی 2023 کے احتجاج سے متعلق انسداد دہشت گردی ایکٹ کے تحت دیگر مقدمات بھی زیرِ سماعت ہیں۔