بھارتی پارلیمان (لوک سبھا) کے رکن امریندر سنگھ راجہ نے پاک بھارت کشیدگی کے دوران بھارتی فضائیہ کے جدید ترین رافیل طیارے کے گرنے کی تصدیق کردی ہے۔ امریندر سنگھ راجہ نے دعویٰ کیا ہے کہ پنجاب کے علاقے بسیانہ ائیر فورس اسٹیشن کے قریب ایک لڑاکا طیارے کا ٹیل گرا تھا، جس پر واضح طور پر ”BS-001“ لکھا ہوا تھا۔ ان کا کہنا تھا کہ یہ ٹیل کسی اور طیارے کا نہیں بلکہ رافیل جیٹ کا ہی تھا، جو کہ بھارت کا سب سے مہنگا اور جدید لڑاکا طیارہ سمجھا جاتا ہے۔
امریندر سنگھ راجہ نے مزید انکشاف کیا کہ اس حادثے میں ایک شخص جان بحق اور نو افراد زخمی ہوئے۔ انہوں نے مزید کہا کہ بھارتی ائیر مارشل نے بھی طیارہ گرنے کی تصدیق کی، تاہم عوامی سطح پر اس واقعے کو ایک ”غیر شناخت شدہ طیارے کے پرزے“ سے تعبیر کیا گیا۔
بھارت اور روس براہموس 2 ہائپر سونک میزائل کی مشترکہ تیاری کے لیے سرگرم
رکن پارلیمنٹ کے مطابق، بھارتی فضائیہ کی اعلیٰ قیادت نے حقیقت چھپاتے ہوئے اس واقعے کو ایک معمولی تکنیکی خرابی یا شناخت نہ ہونے والے طیارے کا حصہ قرار دیا، حالانکہ شواہد سے واضح ہوتا ہے کہ یہ ایک تباہ شدہ رافیل جیٹ کا ٹکڑا تھا۔
امریندر سنگھ راجہ نے بھارتی حکومت پر شدید تنقید کرتے ہوئے کہا کہ ’بھارتی عوام سے حقائق چھپائے گئے، اور دشمن کے ساتھ حقیقی جھڑپوں میں ہونے والے نقصان کو پوشیدہ رکھا گیا۔‘
6 اور 7 مئی 2025 کی درمیانی رات بھارت نے ایک بار پھر اپنی روایتی جارحیت کا مظاہرہ کرتے ہوئے پاکستانی علاقوں پر میزائل حملے کیے، جن میں چھ حساس مقامات کو نشانہ بنایا گیا۔ بھارتی فضائیہ نے جو مقامات نشانہ بنائے، ان میں بہاولپور کے احمد پور شرقیہ میں واقع سبحان مسجد، مظفرآباد کی بلال مسجد، کوٹلی کی عباس مسجد، مریدکے کی ام القریٰ مسجد، سیالکوٹ کی تحصیل میں واقع گاؤں کوٹکی لوہارا اور شکر گڑھ شامل تھے۔ ان حملوں کا مقصد پہلگام میں کئے گئے دہشت گرد حملے کی خفت مٹانا تھا، جس کا الزام بھارت نے بنا کسی ثبوت کے پاکستان پر عائد کیا تھا۔
تاہم پاکستان نے اس جارحیت کا بھرپور اور فوری جواب دیا۔ پاکستان ایئر فورس نے ایک شاندار دفاعی کارروائی کرتے ہوئے صرف 40 منٹ کے اندر اندر بھارت کے چھ جنگی طیارے مار گرائے۔ ان میں تین جدید فرانسیسی ساختہ رافیل لڑاکا طیارے، ایک روسی ساختہ Su-30MKI، ایک میراج 2000 اور ایک MiG-29 شامل تھے۔ یہ تمام طیارے پاکستانی حدود سے ہی نشانہ بنائے گئے، جب کہ کسی بھی پاکستانی طیارے نے بھارتی حدود کی خلاف ورزی نہیں کی۔
