امریکی محکمہ خارجہ نے اپنے شہریوں کو شام کا سفر نہ کرنے کی ہدایت کرتے ہوئے وہاں موجود افراد کو فوری طور پر ملک چھوڑنے کی ہدایت کی ہے۔

یہ انتباہ شام کے جنوبی صوبے السویدہ میں سیکیورٹی صورت حال بگڑنے اور پرتشدد واقعات میں اضافے کے بعد جاری کیا گیا۔ امریکی سفارتخانے کی جانب سے یہ وارننگ جمعرات کے روز سوشل میڈیا پلیٹ فارم ایکس (سابقہ ٹوئٹر) پر جاری کی گئی۔

بیان میں کہا گیا ہے کہ شام میں جاری مسلح جھڑپوں اور کشیدہ حالات کے باعث امریکی شہریوں کی جان کو سنگین خطرات لاحق ہیں۔

محکمہ خارجہ نے واضح کیا کہ شام کیلئے سفری انتباہ بدستور ”لیول 4“ پر برقرار ہے، جو خطرے کی بلند ترین سطح ہے۔

امریکی حکام کا کہنا ہے کہ جو شہری فی الحال شام سے روانہ نہیں ہو سکتے، انہیں چاہیے کہ وہ فوری طور پر محفوظ مقامات پر پناہ لیں اور حالات معمول پر آنے تک احتیاطی تدابیر اختیار کریں۔

واضح رہے کہ شام کے مختلف علاقوں خصوصاً السویدہ میں حالیہ دنوں میں مسلح گروپوں کے درمیان جھڑپوں میں شدت آئی ہے، جس کے باعث شہریوں کی سیکیورٹی کو شدید خطرات لاحق ہو چکے ہیں۔