پاکستان مسلم لیگ (ن) کے رہنما سینیٹر عرفان صدیقی نے کہا ہے کہ پی ٹی آئی نے ایک بار پھر ثابت کیا کہ اس کا آئینی تقاضوں اور جمہوری روایات سے کوئی تعلق نہیں۔

سوشل میڈیا پلیٹ فارم ”ایکس“ پر اپنے بیان میں مسلم لیگ (ن) کے سینیٹرعرفان صدیقی کا کہنا تھا کہ پی ٹی آئی کا آئینی تقاضوں سے کوئی تعلق نہیں، اپوزیشن جماعتوں سے کیسی مفاہمت کہ ان کے ارکان کو حلف اٹھانے سے روکا جا رہا ہے؟ یہی غیر آئینی رویہ بانی پی ٹی آئی نے عدم اعتماد سے بچنے کے لیے اپنایا۔

عرفان صدیقی نے کہا کہ قاسم سوری اور عارف علوی کے ذریعے غیر آئینی اقدامات کیے گئے، نہ عدم اعتماد روکا جا سکا، نہ اپوزیشن ارکان کے حلف کو روکا جا سکے گا۔

رہنما مسلم لیگ (ن) کا مزید کہنا تھا کہ پی ٹی آئی صرف سڑکوں، چوراہوں اور پرتشدد احتجاج کے لیے بنی ہے، یہ جماعت جمہوری ایوانوں کے مزاج سے مطابقت نہیں رکھتی۔