صوابی میں موٹر وے پر ایکسائز ڈیپارٹمنٹ کی گاڑی کو پیش آنے والے حادثے میں ایکسائز انسپکٹر عزیر محمد موقع پر جاں بحق ہو گئے، جب کہ چار اہلکار شدید زخمی ہو گئے۔ ریسکیو 1122 کے مطابق زخمیوں کو فوری طور پر ابتدائی طبی امداد فراہم کی گئی اور انہیں تشویشناک حالت میں باچا خان میڈیکل کمپلیکس منتقل کیا گیا۔

زخمی اہلکاروں میں 32 سالہ قمر زمان شامل ہیں جن کا تعلق باجوڑ سے ہے، جبکہ 29 سالہ سپاہی منصور اور 23 سالہ سپاہی محمد اعجاز کا تعلق کرک سے ہے۔ 19 سالہ سپاہی سلار بھی زخمی ہوا ہے، جو باجوڑ کا رہائشی ہے۔ جاں بحق ہونے والے 39 سالہ انسپکٹر عزیر محمد کا تعلق بھی باجوڑ سے تھا۔

ریسکیو ذرائع کے مطابق ایکسائز کی گاڑی ایک مشتبہ گاڑی کا تعاقب کرتے ہوئے حادثے کا شکار ہوئی۔ واقعے کی مزید تحقیقات شروع کر دی گئی ہیں تاکہ حادثے کی اصل وجوہات کا پتہ چلایا جا سکے۔