سندھ طاس معاہدے کی معطلی کا معاملہ او آئی سی تک پہنچ گیا۔ جدہ میں جاری او آئی سی کے آزاد انسانی حقوق کمیشن کے اجلاس میں پاکستان نے یہ معاملہ اٹھایا۔

سندھ طاس معاہدے کی معطلی کا معاملہ عالمی سطح پر پہنچ گیا، جہاں پاکستان نے اس اہم مسئلے کو او آئی سی کے فورم پر اٹھا دیا۔

جدہ میں جاری او آئی سی کے آزاد انسانی حقوق کمیشن کے 25 ویں اجلاس میں پانی کے حق کے موضوع پر گفتگو کے دوران پاکستان کے مستقل مندوب سید فواد شیر نے بھارتی ہٹ دھرمی پر شدید تحفظات کا اظہار کیا۔

سید فواد شیر نے اجلاس میں کہا کہ پاکستان پہلے ہی پانی کی قلت جیسے سنگین مسئلے سے دوچار ہے اور بھارت کی جانب سے سندھ طاس معاہدے کی معطلی نہ صرف معاہدے کی خلاف ورزی ہے بلکہ خطے میں موسمیاتی مسائل کو بھی مزید سنگین کر دے گی۔

انہوں نے زور دیا کہ پانی انسانی حق ہے اور اس پر کسی قسم کی سیاسی چال بازی ناقابل قبول ہے۔

اجلاس میں او آئی سی وزرائے خارجہ نے بھی بھارتی فیصلے پر اظہارِ تشویش کیا اور پاکستان کے مؤقف کی حمایت کی۔ اجلاس میں شریک مندوبین نے پانی کی منصفانہ تقسیم اور اس حق کے تحفظ کی اہمیت پر زور دیا۔