لاہور میں مون سون کی بارشیں شدت کے ساتھ جاری ہیں۔ 14 جولائی سے شروع ہونے والا تیسرا اسپیل وقفے وقفے سے برس رہا ہے، جس نے شہریوں کو گرمی کی لہر سے نجات دلادی مگر ساتھ ہی تباہ کن حادثات بھی پیش آئے،شہر بھر میں گزشتہ 24 گھنٹوں کے دوران مختلف حادثات میں 14 افراد جاں بحق اور 6 زخمی ہو گئے۔
ریسکیو 1122 کے ترجمان کے مطابق بارش کے باعث چھت گرنے کے تین افسوسناک واقعات پیش آئے جن میں 11 افراد جان کی بازی ہار گئے جبکہ 6 افراد زخمی ہوئے۔
چھت گرنے کا پہلا واقعہ ٹھوکر نیاز بیگ کے علاقے مرید وال گاؤں میں پیش آیا، جہاں ایک ہی خاندان کے 5 افراد جاں بحق جبکہ 2 افراد زخمی ہو گئے۔ریسکیو 1122 کے مطابق جاں بحق افراد میں 60 سالہ مانگا، اُن کی اہلیہ 55 سالہ عشرت، ان کی پوتیاں 3 سالہ خدیجہ اور 4 سالہ لطیفہ، اور 35 سالہ بہو رانی شامل ہیں۔ جبکہ گھر کا سربراہ 30 سالہ فیصل اور اس کی 5 سالہ بیٹی ببلی زخمی ہوگئے، جنہیں فوری طور پر اسپتال منتقل کر دیا گیا۔
دوسرا واقعہ مشن کالونی رائیونڈ روڈ پر پیش آیا جس میں 3 افراد جاں بحق اور ایک شخص زخمی ہوا۔ تیسرا واقعہ کوٹ جمال رائیونڈ روڈ پر پیش آیا، جہاں ایک شخص جانبحق جبکہ 3 افراد زخمی ہوئے۔
علاوہ ازیں ہربنس پورہ کے علاقے میں کرنٹ لگنے کے افسوسناک واقعے میں دو بچے جاں بحق ہو گئے۔مومن پورہ جی ٹی روڈ پر گھر کی چھت گرنے سے 3 افراد جان کی بازی ہار گئے۔
محکمہ موسمیات نے مزید بارشوں کی پیشگوئی کی ہے جبکہ ضلعی انتظامیہ نے شہریوں سے اپیل کی ہے کہ کمزور اور بوسیدہ عمارتوں سے دور رہیں اور بارش کے دوران بجلی کے آلات سے احتیاط برتیں۔
دوسری جانب لاہور میں مسلسل بارش نے نظام زندگی متاثر کر دیا ہے۔ ترجمان پی ڈی ایم اے کے مطابق 4 گھنٹوں تک جاری طوفانی بارش کے باعث کئی علاقوں میں پانی جمع ہوگیا۔ سب سے زیادہ بارش سمن آباد میں 147 ملی میٹر ریکارڈ کی گئی۔ دیگر علاقوں میں درج ذیل بارش ریکارڈ ہوئی:
پی ڈی ایم اے کے مطابق نہ صرف لاہور بلکہ سیالکوٹ، گجرات، نارووال، قصور، مری، اٹک، گجرانوالہ، بہاولنگر اور ساہیوال میں بھی بارش ریکارڈ کی گئی ہے۔ محکمہ موسمیات نے آئندہ 24 گھنٹوں میں پنجاب کے بیشتر اضلاع میں مزید موسلادھار بارشوں کی پیشگوئی کی ہے۔ مون سون کا یہ سپیل 17 جولائی تک جاری رہنے کا امکان ہے۔
انتظامیہ نے شہریوں کو غیر ضروری سفر سے گریز کرنے، پرانے مکانات میں احتیاط برتنے اور ہنگامی صورت میں ریسکیو اداروں سے فوری رابطہ کرنے کی ہدایت کی ہے۔
پنجاب میں موسلادھار بارش، حادثات اور کرنٹ لگنے سے 12 افراد جاں بحق، 34 زخمی
پنجاب کے مختلف شہروں میں موسلادھار بارش کے دوران افسوسناک حادثات میں بارہ افراد جاں بحق اور چونتیس زخمی ہو گئے۔ چھتیں گرنے اور کرنٹ لگنے کے متعدد واقعات نے صوبے میں خوف و ہراس پھیلا دیا۔
فیصل آباد میں دو مختلف مقامات پر چھت گرنے کے واقعات میں میاں بیوی اور ماں بیٹے سمیت چار افراد جان کی بازی ہار گئے۔ شیخوپورہ کے علاقے عثمان نگر میں ایک گھر کی چھت گرنے سے ایک شخص جاں بحق اور دو افراد زخمی ہو گئے۔ رینالہ خورد کے نواحی گاؤں میں چھت گرنے سے ایک اور شخص جاں بحق ہو گیا، جب کہ کرنٹ لگنے کے دو مختلف واقعات میں مزید دو افراد جان سے گئے۔
اوکاڑہ میں کمرے کی چھت گرنے سے ایک بچہ جاں بحق جبکہ اس کی بہن اور بھائی زخمی ہو گئے۔ شاہ کوٹ اور عارف والا میں بھی مکانات کی چھتیں گرنے اور بورے والا میں کرنٹ لگنے سے تین افراد جاں بحق ہو گئے۔
ننکانہ صاحب میں چھتیں اور دیواریں گرنے کے مختلف واقعات میں ایک شخص جان کی بازی ہار گیا، جبکہ دو خواتین اور سات سالہ بچے سمیت آٹھ افراد زخمی ہو گئے۔ ادھر قصور میں بھی بارش کے باعث دو مقامات پر خستہ حال چھتیں گرنے سے آٹھ افراد زخمی ہو گئے۔
ریسکیو حکام کا کہنا ہے کہ شدید بارشوں کے باعث کئی علاقوں میں خستہ حال عمارتیں اور گھروں کی چھتیں خطرہ بن چکی ہیں۔ شہریوں کو احتیاط برتنے اور خستہ حال عمارتوں سے دور رہنے کی ہدایت کی گئی ہے۔ پنجاب حکومت نے ضلعی انتظامیہ کو الرٹ رہنے اور امدادی سرگرمیاں تیز کرنے کی ہدایت جاری کر دی ہے۔
