مئی کی ماہانہ فیول ایڈجسٹمنٹ کی مد میں بجلی کی قیمت میں 10 پیسے فی یونٹ اضافے کا امکان ہے۔ سنٹرل پاور پرچیزنگ ایجنسی (سی پی پی اے) نے اس حوالے سے نیپرا کو درخواست جمع کرا دی ہے۔

سی پی پی اے کے مطابق مئی 2025 میں ملک بھر میں 12 ارب 75 کروڑ یونٹس سے زائد بجلی پیدا کی گئی، جس کی لاگت اوسطاً 7 روپے 49 پیسے فی یونٹ رہی۔

درخواست کے مطابق مئی کے لیے بجلی کی ریفرنس لاگت 7 روپے 39 پیسے فی یونٹ مقرر کی گئی تھی، اس طرح فی یونٹ لاگت میں 10 پیسے کا فرق سامنے آیا ہے۔

بجلی صارفین کیلئے خوشخبری: بنیادی ٹیرف میں ڈیڑھ روپے فی یونٹ کمی کی منظوری

نیپرا سی پی پی اے کی اس درخواست پر 30 جون کو سماعت کرے گا، جس کے بعد حتمی فیصلہ کیا جائے گا کہ صارفین سے یہ اضافی رقم وصول کی جائے یا نہیں۔

اگر نیپرا منظوری دیتا ہے تو آئندہ ماہ صارفین کو بجلی کے بلوں میں اضافی بوجھ برداشت کرنا پڑ سکتا ہے۔