پاکستان اسٹاک ایکسچینج میں آج کاروباری ہفتے کے دوران زبردست تیزی کا رجحان دیکھنے میں آیا، سرمایہ کاروں کے پُرجوش اعتماد اور مثبت معاشی اشاروں کے باعث 100 انڈیکس تاریخ کی بلند ترین سطح پر بند ہوا۔ انڈیکس میں 1347 پوائنٹس کا غیر معمولی اضافہ ریکارڈ کیا گیا، جس کے بعد انڈیکس 1,21,798 پوائنٹس پر پہنچ کر بند ہوا۔

کاروباری دن کے دوران انڈیکس نے پہلی بار 1 لاکھ 21 ہزار 639 پوائنٹس کی سطح عبور کی، جو اسٹاک مارکیٹ کی تاریخ میں اب تک کی سب سے بلند سطح ہے۔ ماہرین کے مطابق مارکیٹ میں یہ غیر معمولی تیزی کئی اہم عوامل کا نتیجہ ہے جن میں آئندہ مالی سال کے بجٹ سے متعلق مثبت امیدیں، آئی ایم ایف کے ساتھ مذاکرات میں پیش رفت، اور روپے کی قدر میں استحکام سرفہرست ہیں۔

اس تیزی کا سب سے زیادہ فائدہ بینکنگ، سیمنٹ، توانائی اور ٹیلی کام سیکٹرز کو ہوا جہاں بڑے پیمانے پر سرمایہ کاری دیکھنے کو ملی۔ معاشی ماہرین کا کہنا ہے کہ اسٹاک مارکیٹ کی یہ پرفارمنس نہ صرف سرمایہ کاروں کے بڑھتے ہوئے اعتماد کا ثبوت ہے بلکہ ملکی معیشت کے حوالے سے بہتری کی جانب واضح اشارہ بھی ہے۔

سرمایہ کاروں کو توقع ہے کہ حکومت کی جانب سے مالیاتی پالیسیوں میں تسلسل اور استحکام برقرار رکھا گیا تو آئندہ دنوں میں بھی مارکیٹ اسی طرح مثبت رجحان کا مظاہرہ کرے گی۔