پاک بھارت کشیدہ صورتحال پر پاکستان نے دنیا کو اپنے مؤقف سے آگاہ کرنے کے لیے سفارتی محاذ پر اہم قدم اٹھا لیا۔ وزیر اعظم شہباز شریف کی ہدایت پر تشکیل دی گئی سفارتی کمیٹی 2 جون کو امریکا کا دورہ کرے گی، جہاں نیویارک اور واشنگٹن میں اہم سفارتی ملاقاتیں متوقع ہیں۔

ذرائع کے مطابق وفد کی قیادت سابق وزیر خارجہ بلاول بھٹو زرداری کریں گے۔ وفد اقوام متحدہ کے سیکریٹری جنرل انتونیو گوتریس سے خصوصی ملاقات کرے گا، جبکہ واشنگٹن میں ٹرمپ انتظامیہ کے اعلیٰ حکام، امریکی کانگریس کے اراکین، تھنک ٹینکس اور میڈیا نمائندوں سے بھی ملاقاتیں طے کی گئی ہیں۔

سفارتی کمیٹی کا اجلاس، بھارت کو سفارتی محاذ پر منہ توڑ جواب دینے کا عزم

پاکستانی وفد ان ملاقاتوں میں خطے کی سلامتی کو درپیش خطرات، خصوصاً سندھ طاس معاہدے کی معطلی اور اس کے ممکنہ اثرات پر دنیا کو آگاہ کرے گا۔ اس کے علاوہ پاک بھارت تناؤ پر پاکستان کے مؤقف کو مؤثر انداز میں عالمی برادری کے سامنے رکھا جائے گا۔

ذرائع کے مطابق اس سفارتی سرگرمی کا مقصد بین الاقوامی سطح پر بھارت کی پالیسیوں کے منفی اثرات کو اجاگر کرنا اور عالمی حمایت حاصل کرنا ہے تاکہ خطے میں امن و استحکام کو فروغ دیا جا سکے۔

وزارت خارجہ میں اعلیٰ سطحی بریفنگ کا اہتمام، سفارتی کمیٹی کو اہم امور پر آگاہ کیا جائے گا

واضح رہے کہ وزیراعظم نے حال ہی میں موجودہ بین الاقوامی صورتحال کے تناظر میں ایک اعلیٰ سطح سفارتی کمیٹی تشکیل دی تھی جو مختلف ممالک کا اہم دورہ کرے گی۔ بلاول بھٹو زرداری کی قیادت میں قائم سفارتی کمیٹی بھارت کے خلاف عالمی محاذ پر پاکستان کی پوزیشن کو مضبوط بنانے کے لیے کام کر رہی ہے۔