سینئر وزیر سندھ شرجیل انعام میمن اور وزیر توانائی سید ناصر حسین شاہ نے چین میں چیری ہیڈکوارٹر ووہو کا دورہ کیا، جہاں چینی کمپنی چیری ہولڈنگز گروپ نے سندھ بھر میں الیکٹرک گاڑیوں (ای وی) کے لیے چارجنگ پوائنٹس نصب کرنے پر آمادگی ظاہر کر دی۔
دورے کے دوران چیری کے چیئرمین این توگیو نے پاکستانی وزراء کا پرتپاک استقبال کیا۔ اجلاس میں طے پایا کہ سندھ کے تمام اضلاع میں ہر 50 کلومیٹر پر ایک ای وی چارجنگ اسٹیشن قائم کیا جائے گا۔
سینئر وزیر شرجیل انعام میمن کا کہنا تھا کہ چارجنگ اسٹیشنز سے ای وی موٹر سائیکل، کار اور ٹرک رکھنے والوں کو بہت فائدہ ہوگا۔ سندھ میں ٹرانسپورٹ نظام جدید ہو رہا ہے اور ہمارا ویژن ماحول دوست ٹیکنالوجی کو فروغ دینا ہے۔
سندھ حکومت کا چین کے تعاون سے منی ٹرک اسمبلنگ لائن کراچی میں قائم کرنے کا اعلان
شرجیل انعام میمن نے مزید کہا کہ چینی کمپنی کراچی میں ای وی منی ٹرکس کے لیے اسمبلنگ پلانٹ بھی قائم کر رہی ہے جس سے نہ صرف سستی گاڑیاں دستیاب ہوں گی بلکہ مقامی افراد کے لیے روزگار کے مواقع بھی پیدا ہوں گے۔
دورے کے دوران چینی کمپنی کی جانب سے سندھ کے دیہی علاقوں میں سولر انرجی کے منصوبوں پر بھی بھرپور تعاون کی یقین دہانی کروائی گئی۔
وزیر توانائی سندھ ناصر حسین شاہ نے کہا کہ غریب خاندانوں کو سولر سسٹم دیئے جارہے ہیں گھروں کے سولرائزیشن سے عام آدمی کے بجلی کی ضروریات باآسانی پوری ہو سکیں گی۔
حکومت کی اعلان کردہ مفت الیکٹرک اسکوٹی کیسے حاصل کریں، شرائط کیا ہیں؟
ناصر حسین شاہ نے کہا کہ ان منصوبوں سے مقامی معیشت کو فروغ ملے گا روزگار کے نئے مواقع پیدا ہوں گے اور دیہی علاقوں کی سماجی و معاشی ترقی ممکن ہو سکے گی۔
سندھ میں ای وی ٹیکسی اور پنک ٹیکسی چلانے کا اعلان
یہ شراکت داری سندھ میں ماحول دوست ٹیکنالوجی، قابل تجدید توانائی اور مقامی روزگار کے فروغ کے لیے ایک اہم پیش رفت ثابت ہو رہی ہے۔
