وزیرِاعظم محمد شہباز شریف نے بھارتی پروپیگنڈے اور مزموم سازشوں کو عالمی سطح پر بے نقاب کرنے کیلئے سفارتی وفد بھیجنے کا فیصلہ کر لیا، وزیرِ اعظم نے وفد کی قیادت بلاول بھٹو زرداری کو سونپ دی۔ سابق وزیر خارجہ بلاول بھٹو نے بھی سماجی رابطے کی ویب سائٹ پر اس کی تصدیق کی۔
اعلامیے کے مطابق وزیرِاعظم شہباز شریف نے بھارتی پروپیگنڈے کو عالمی سطح پر بے نقاب کرنے کا فیصلہ کر لیا ہے۔ پاکستان کا اعلی سطحی سفارتی وفد یورپ ، امریکہ بھیجا جائیگا۔
اعلامیے میں کہا گیا کہ وزیرِاعظم نے چیئرمین پاکستان پیپلز پارٹی بلاول بھٹو زرداری کو ٹیلی فون کیا اور وفد کی قیادت بلاول بھٹو زرداری کو سونپ دی، ڈاکٹر مصدق ملک، انجینئیر خرم دستگیر، سینیٹر شیری رحمن، حنا ربانی کھر وفد میں شامل ہیں۔
اعلامیے میں یہ بھی کہا گیا کہ فیصل سبزواری، تحمینہ جنجوعہ اور جلیل عباس جیلانی بھی وفد کا حصہ ہونگے، وفد لندن، واشنگٹن، پیرس اور برسلزکا دورہ کرے گا، وفد پاکستان کی خطے میں امن قائم رکھنے کیلئے کوششوں کو اجاگر کرے گا۔
بھارت نے پانی روکا تو ایران کو بھی مسائل ہوں گے، بلاول بھٹو
بعدازاں، پاکستان پیپلز پارٹی کے چیئرمین بلاول بھٹو زرداری سماجی رابطے کی ویب سائٹ ایکس پر اپنے پیغام میں کہا کہ وزیرِاعظم شہباز شریف کی جانب سے آج مجھ سے رابطہ کیا گیا ہے، جس میں انہوں نے مجھ سے درخواست کی ہے کہ میں ایک وفد کی قیادت کرتے ہوئے عالمی سطح پر پاکستان کی نمائندگی کروں۔
بلاول بھٹو زرداری نے سماجی رابطے کی ویب سائٹ ایکس پر اپنے پیغام میں مزید کہا کہ وزیرِاعظم شہباز شریف نے مجھ سے درخواست کی ہے کہ میں ایک وفد کی قیادت کرتے ہوئے دنیا میں پاکستان کا امن کا مؤقف پیش کروں۔
پاکستان نے ثابت کردیا کہ ہم جنگ نہیں چاہتے مگر اپنا دفاع کرنا جانتے ہیں، بلاول بھٹو
چیئرمین پی پی پی نے کہا ہے کہ مجھے عالمی سطح پر پاکستان کی نمائندگی کی ذمے داری قبول کرنے پر فخر ہے، میں ان مشکل حالات میں پاکستان کی خدمت کے لیے پُرعزم ہوں۔
