پنجاب اسمبلی میں پاک افواج کی بھارتی جارحیت کے خلاف عظیم کامیابی پر خراجِ تحسین پیش کرتے ہوئے ممبر صوبائی اسمبلی سارہ احمد مہوش کی جانب سے ایک اہم قرارداد جمع کرا دی گئی ہے، جس میں ہر سال 10 مئی کو ”یومِ فتحِ پاکستان“ کے طور پر منانے کا مطالبہ کیا گیا ہے۔

قرارداد میں کہا گیا ہے کہ یہ ایوان پاکستان کی مسلح افواج کو عظیم عسکری کامیابی پر مبارکباد پیش کرتا ہے، بھارت کی جانب سے طاقت کا توازن بدلنے کی تمام کوششیں ناکام ہو گئیں اور پاکستان نے عسکری مہارت، حکمت عملی اور ٹیکنیکل برتری سے دشمن کو فیصلہ کن شکست دی۔

قرارداد میں اس امر کو اجاگر کیا گیا کہ پاکستان نے عسکری اہداف کو نشانہ بنا کر اخلاقی اور اسٹریٹجک برتری حاصل کی، جبکہ بھارت کا جدید عسکری ساز و سامان جیسے کہ رافیل طیارے، براہموس میزائل اور S-400 دفاعی نظام مکمل طور پر ناکام ہو گیا۔

بھارت میں 26 فوجی اہداف کو نشانہ بنایا، پاک فوج نے آپریشن بنیان مرصوص کی تفصیلات پیش کردیں

قرارداد میں مزید کہا گیا ہے کہ پاکستان اور چین کا عسکری اتحاد اب خطے میں ایک نئی طاقتور حقیقت بن چکا ہے، جو کسی بھی جارحیت کا مؤثر جواب دینے کی صلاحیت رکھتا ہے۔

ایوان نے آرمی چیف، جوائنٹ چیفس آف اسٹاف کمیٹی، پاک فضائیہ، پاک بحریہ اور دیگر سیکیورٹی اداروں کو خراجِ تحسین پیش کیا، اور شہداء اور معصوم بچوں کو بھی یاد کیا۔