وفاقی وزیر اطلاعات عطا اللہ تارڑ نے بین الاقوامی اور مقامی میڈیا کے ہمراہ لائن آف کنٹرول کا دورہ کیا۔ وزارت اطلاعات کی جانب سے اس دورے میں مقامی اور عالمی میڈیا کے نمائندگان کو مکمل سہولیات فراہم کی گئیں۔
اس دورے کا مقصد بھارت کی جانب سے پاکستان کے خلاف کیے گئے بے بنیاد اور جھوٹے پروپیگنڈے کو زمینی حقائق کی روشنی میں بے نقاب کرنا تھا۔ میڈیا نمائندگان کو ان مخصوص مقامات پر لے جایا گیا جنہیں بھارت مبینہ دہشت گردی کے ٹھکانے قرار دیتا رہا ہے۔
بھارتی جھوٹ کو بے نقاب کرنے کیلئے عالمی و قومی میڈیا کا آزاد کشمیر کا دورہ
دورے کے دوران صحافیوں نے خود حالات کا مشاہدہ کیا مقامی آبادی کی گواہیاں سنیں اور بھارت کے بے بنیاد الزامات کی حقیقت جاننے کا موقع حاصل کیا۔ عطا اللہ تارڑ نے اس موقع پر کہا کہ جو مقامات بھارت خیالی دہشت گرد کیمپس قرار دیتا ہے وہ دراصل عام شہری آبادی کے علاقے ہیں۔
بھارتی جارحیت کا خدشہ، آزاد کشمیر میں خوراک ذخیرہ کرنے کا عمل شروع
انہوں نے کہا کہ پاکستان ایک ذمہ دار ریاست ہے جو نہ صرف علاقائی بلکہ عالمی امن کے لیے بھی پرعزم ہے۔ ہم نے بارہا اپنے عمل سے ثابت کیا ہے کہ ہم امن کے داعی ہیں، لیکن اپنی خودمختاری کے دفاع کے لیے ہر حد تک جائیں گے۔
عطا اللہ تارڑ نے مزید کہا کہ بھارت کو الزام تراشی سے پہلے مقبوضہ کشمیر میں انسانی حقوق کی سنگین خلاف ورزیوں کا نوٹس لینا چاہیے۔ بھارت اپنی داخلی ناکامیوں کو چھپانے کے لیے ایل او سی پر پروپیگنڈا کرتا ہے، مگر آج عالمی میڈیا نے خود آنکھوں سے اصل حقیقت دیکھ لی ہے۔
وفاقی وزیر اطلاعات نے کہا کہ پاکستان نے ایک بار پھر واضح کر دیا ہے کہ وہ خطے میں امن کا خواہاں ہے، تاہم کسی بھی بھارتی جارحیت کا فوری اور منہ توڑ جواب دیا جائے گا۔
