اسلامی ممالک کی تنظیم ’او آئی سی‘ نے جنوبی ایشیا میں امن و سلامتی کی بگڑتی ہوئی صورتحال پر گہری تشویش کا اظہار کرتے ہوئے پاکستان اور بھارت پر زور دیا ہے کہ وہ کشیدگی میں اضافے سے گریز کرتے ہوئے مسائل کا حل پرامن مذاکرات کے ذریعے نکالیں۔
او آئی سی کی جانب سے جاری اعلامیے میں کہا گیا ہے کہ جنوبی ایشیا میں امن، سلامتی اور استحکام کو یقینی بنایا جانا وقت کی اہم ضرورت ہے۔ تنظیم نے دونوں ممالک سے اپیل کی ہے کہ وہ تحمل کا مظاہرہ کریں اور کسی بھی ایسے اقدام سے گریز کریں جو خطے میں کشیدگی کو مزید بڑھا سکتا ہو۔
امریکا نے پاکستان اور بھارت سے کشیدگی کا ذمہ دارانہ حل نکالنے کا مطالبہ کردیا
اعلامیے میں کہا گیا ہے کہ او آئی سی دہشت گردی کی ہر شکل اور صورت کی سختی سے مذمت کرتی ہے۔ ساتھ ہی تنظیم نے ایک بار پھر کشمیری عوام کی سیاسی، سفارتی اور اخلاقی حمایت کے عزم کا اعادہ کیا۔
او آئی سی نے عالمی برادری سے مطالبہ کیا ہے کہ اقوام متحدہ کی سلامتی کونسل کی قراردادوں کے مطابق مسئلہ کشمیر کے پائیدار اور منصفانہ حل کے لیے مؤثر اقدامات کیے جائیں تاکہ جنوبی ایشیا میں مستقل امن کو یقینی بنایا جا سکے۔
بھارت نیا عالمی تنازعہ کھڑا نہ کرے، امریکی نائب صدر کا انتباہ
اعلامیے میں وزرائے خارجہ اجلاس کے فیصلوں کی روشنی میں کشمیریوں کے حق خودارادیت کی مکمل حمایت کا اعادہ بھی کیا گیا ہے۔
