وزیراعظم شہباز شریف نے سعودی سفیر نواف بن سعید المالکی سے ملاقات کی، متحدہ عرب امارات کے سفیر حماد عبید ابراہیم سالم الزابی اور کویت کے سفیر ناصر عبدالرحمن جاسر سے بھی الگ الگ ملاقات کی، وزیراعظم شہبازشریف نے کہا کہ پاکستان کا پہلگام واقعے سے کوئی لینا دینا نہیں، واقعے کی قابل اعتماد، ،شفاف اور غیرجانبدار بین الاقوامی تحقیقات کی ضرورت ہے، پاکستان مغربی محاذ سے پیدا ہونے والی دہشت گردی سے نمٹ رہا ہے، بھارت ہماری توجہ دہشت گردی کے خلاف کوششوں سے ہٹانا چاہتا ہے۔

وزیراعظم شہباز شریف سے سعودی سفیر نواف بن سعید المالکی نے ملاقات کی، ملاقات کے دوران وزیراعظم نے حرمین شریفین کے متولی شاہ سلمان بن عبدالعزیز آل سعود، ولی عہد اور وزیر اعظم شہزادہ محمد بن سلمان بن عبدالعزیز السعود کے لیے نیک تمناؤں کا اظہار کیا، انہوں نے سعودی قیادت اور عوام کا شکریہ ادا کیا کہ انہوں نے ہمیشہ پاکستان کے ساتھ یکجہتی کا اظہار کیا۔

پہلگام واقعے کے بعد جنوبی ایشیا میں امن و امان کی موجودہ صورتحال پر پاکستان کا مؤقف بیان کرتے ہوئے وزیر اعظم نے کہا کہ پاکستان نے دہشت گردی کی تمام شکلوں اور مظاہر کی مذمت کی ہے، پاکستان نے گزشتہ برسوں میں انسداد دہشت گردی کی کوششوں میں بڑی قربانیاں دی ہیں جو کہ نہ صرف پاکستان بلکہ پوری دنیا کے تحفظ کے لیے انتہائی اہم ثابت ہوئی ہیں۔

وزیراعظم نے بھارت نے بغیر کسی ثبوت کے پہلگام واقعے سے پاکستان کو جوڑنے کے بے بنیاد بھارتی الزامات کو یکسر مسترد کیا اور واقعے کی شفاف اور غیر جانب دار بین الاقوامی تحقیقات کے اپنے مطالبے کا اعادہ کیا۔

سعودی عرب سمیت دوست ممالک کے تعاون سے گزشتہ پندرہ ماہ کی محنت سے حاصل ہونے والے معاشی فوائد کو مستحکم کرنے پر حکومت کی مکمل توجہ کو اجاگر کرتے ہوئے وزیراعظم نے کہا کہ پاکستان کی کامیابیوں کو خطرے میں ڈالنے اور ملک کو اقتصادی ترقی کی راہ سے ہٹانے کی بھارتی کوششیں ناقابل فہم ہیں۔

شہباز شریف نے سعودی عرب سمیت برادر ممالک پر زور دیا کہ وہ خطے میں کشیدگی میں کمی کے لیے ہندوستان پر دباؤ ڈالیں۔ انہوں نے جنوبی ایشیا میں امن و استحکام کے لیے پاکستان کی خواہش کا اعادہ کیا۔

سعودی سفیر نے اس اہم معاملے پر اپنے خیالات کا اظہار کرنے پر وزیراعظم کا شکریہ ادا کیا اور کہا کہ سعودی عرب خطے میں امن و سلامتی کے لیے پاکستان کے ساتھ مل کر کام کرنا چاہتا ہے۔

وزیراعظم شہبازشریف سے یو اے ای کے سفیر کی ملاقات

وزیراعظم شہبازشریف سے یواے ای کے سفیر حماد عبید ابراہیم سالم الزابی نے بھی ملاقات کی، ملاقات میں وزیراعظم نے غیرمتزلزل حمایت پر یو اے ای سے اظہار تشکر کیا۔ وزیر اعظم نے پہلگام واقعے کے بعد پاکستان کے نقطہ نظر سے آگاہ کیا۔

ملاقات کے دوران وزیراعظم نے کہا کہ پاکستان دہشت گردی کا سب سے بڑا شکار رہا ہے، پاکستان مغربی محاذ سے پیدا ہونے والی دہشت گردی سے نمٹ رہا ہے، بھارت توجہ دہشتگردی کے خلاف کوششوں سے ہٹانا چاہتا ہے۔

انھوں نے کہا کہ بھارت کی مذموم کوششوں بے بنیاد الزامات کو مسترد کیا، پاکستان کا پہلگام واقعے سے کوئی لینا دینا نہیں، شفاف،غیرجانبدارانہ عالمی تحقیقات کی ضرورت ہے۔

حماد عبید ابراہیم سالم الزابی نے پاکستان کا موقف شیئرکرنے پر شکریہ ادا کرتے ہوئے کہا کہ امن و سلامتی کے لیے پاکستان کے ساتھ مل کر کام کریںگے۔

وزیراعظم شہباز شریف سے کویتی سفیر کی ملاقات

بعد ازاں وزیراعظم شہبازشریف سے کویت کے سفیر ناصرعبدالرحمن جاسر نے بھی ملاقات کی۔ وزیراعظم نے کویتی امیر کیلئے نیک تمنائوں کا اظہار کرتے ہوئے کہا کہ دونوں ممالک ہمیشہ ایک دوسرے کیساتھ کھڑے ہیں، کویت کے ولی عہد کا جلد دورہ پاکستان کے منتظرہیں۔

ملاقات کے دوران وزیراعظم نے حالیہ صورتحال پر کویتی سفیر کو اعتماد میں لیتے ہوئے کہا کہ پاکستان دہشتگردی کی تمام شکلوں میں مذمت کرتا ہے، پاکستان نے دہشت گردی کی جنگ میں 90 ہزار انسانی جانوں کی قربانی دی ہیں۔

وزیراعظم شہباز شریف نے کہا کہ 152بلین امریکی ڈالر سے زیادہ کا معاشی نقصان اٹھایا ہے، بھارت زبردستی پہلگام واقعہ کو پاکستان سے جوڑنے کی کوشش کرتا ہے، عالمی برادری اس واقعے کی غیر جانبدارانہ تحقیقات کرے۔

کویتی سفیرنے پاکستان کے مؤقف کو آگاہ کرنے پر وزیراعظم کا شکریہ ادا کیا، ناصرعبدالرحمن جاسر نے کہا کہ کویت علاقائی امن وسلامی کیلئے پاکستان کے وژن کا حامی ہے۔