پاکستان کی مقامی ریفائنریز نے حکومت سے مطالبہ کیا ہے کہ مارچ تک پیٹرول اور ڈیزل کی درآمد کو روکا جائے، کیونکہ آئل مارکیٹنگ کمپنیاں مقامی ریفائنریز سے پیٹرولیم مصنوعات نہیں خرید رہیں، جس کے باعث ان کے آپریشنز میں مشکلات پیدا ہو رہی ہیں۔

ریفائنریز کی جانب سے اوگرا کو لکھے گئے خط میں کہا گیا ہے کہ پیٹرول کی فروخت میں 20 فیصد جبکہ ڈیزل کی فروخت میں 31 فیصد کمی آ چکی ہے۔ خط میں مزید کہا گیا ہے کہ اس وقت ملک میں پیٹرول کا 36 دن اور ڈیزل کا 39 دن کا اسٹاک موجود ہے، جس کے باعث درآمدات کو روکنا ضروری ہے۔

خط میں یہ بھی نشاندہی کی گئی ہے کہ ملک میں بارشیں نہ ہونے کی وجہ سے بھی ڈیزل کی کھپت میں نمایاں کمی آئی ہے، جو مقامی ریفائنریز کے لیے مزید مشکلات کا باعث بن رہی ہے۔