سہ فریقی ون ڈے سیریز کھیلنے کے لیے جنوبی افریقی کرکٹ ٹیم بھی لاہور پہنچ گئی، کھلاڑی آج مکمل آرام اور کل سے ٹریننگ کا آغاز کریں گے۔
پاکستان، نیوزی لینڈ اور جنوبی افریقا کے درمیان سہ فریقی سیریز 8 فروری سے شروع ہو رہی ہے، جس میں شرکت کے لیے جنوبی افریقی کرکٹ ٹیم بھی لاہور پہنچ گئی۔
جنوبی افریقا کی ٹیم براستہ دبئی نجی ایئر لائن سے لاہور پہنچی، جسے سخت سکیورٹی کے حصار میں نجی ہوٹل میں پہنچا دیا گیا۔
جنوبی افریقہ کی ٹیم آج مکمل آرام کرے گی اور کل سے ایل سی سی اے گراؤنڈ میں پریکٹس کا آغاز کرے گی، اس سے قبل نیوزی لینڈ کی کرکٹ ٹیم پہلے ہی لاہور پہنچ چکی ہے۔
واضح رہے کہ سہ فریقی سیریز کے افتتاحی میچ میں پاکستان ٹیم ہفتے کو نیوزی لینڈ سے قذافی اسٹیڈیم میں مقابلہ کرے گی جبکہ نیوزی لینڈ اور جنوبی افریقہ کے درمیان سہ ملکی سیریز کا دوسرا میچ 10 فروری کو قذافی اسٹیڈیم میں ہی کھیلا جائے گا۔
