پاکستان پیپلز پارٹی کے چیئرمین بلاول بھٹو زرداری کا کہنا ہے کہ کسی کو وزیراعلیٰ یا کسی وزیر یا بیورو کریسی سے شکایت ہے تو مجھ سے کرے یہ صوبہ پیپلز پارٹی کا ہے کہیں اور جاکر چغلی کرنے کی ضرورت نہیں، ہم تاجروں کے ساتھ مل کر مسائل کا حل نکالیں گے۔
خیال رہے کہ صوبائی حکومت پر تاجروں کی تنقید کے بعد چیئرمین پیپلز پارٹی بلاول بھٹو زرداری نے تاجروں کو آج ظہرانے پر مدعو کیا تھا۔
بلاول بھٹو نے تاجر برادری کے اعزاز میں کراچی میں ایک تقریب کا انعقاد کیا جس میں انہوں نے تاجربرادری سے بات چیت کی اور ان کے مسائل سنے۔
تقریب سے خطاب کرتے ہوئے بلاول بھٹو نے کہا کہ اگر کسی بیوروکریٹ یا وزیراعلیٰ سے کوئی شکایت ہو تو مجھے بتائیں، کسی اور جگہ چغلی کرنے کی ضرورت نہیں ہے۔ بلاول بھٹو نے مزید کہا کہ سندھ میں ذمہ دار پیپلز پارٹی ہے اور ہمیں مسائل کے حل کے لیے آگاہ کریں۔
بلاول بھٹو نے سندھ میں امن و امان کی صورتحال کو پیپلز پارٹی کی بدولت قرار دیتے ہوئے کہا کہ آج آپ سے بھتہ نہیں مانگا جا رہا، صنعتوں کو بند کر کے مزدوروں کو سیاسی جلسوں میں نہیں لے جایا جا رہا اور آپ کی زندگی کو کوئی خطرہ نہیں۔
انہوں نے کہا کہ تاجر برادری کے مسائل بہت پہلے حل ہو جانے چاہیے تھے، اور کراچی اور ملک کی ترقی میں تاجر برادری کا اہم کردار ہے۔
بلاول بھٹو نے اپنے خطاب میں سوال کیا کہ ’کیا میں نے کبھی آپ کو تنگ کیا؟‘ اور کہا کہ ’میں کیوں چاہوں گا کہ میرے یا میری حکومت کے نام پر تاجروں کو تنگ کیا جائے؟‘
انہوں نے مزید کہا کہ ماضی میں کراچی کا چلن اب تاریخ کا حصہ بن چکا ہے اور اب ہوائی باتیں ختم ہونی چاہئیں۔
آخر میں بلاول بھٹو نے کہا کہ 15 سال سے میری حکومت ہے، کیا میں نے آپ کو تنگ کیا؟
ان کا کہنا تھا کہ سندھ میں پیپلز پارٹی کی حکومت ہے اور وزیراعلیٰ آپ کی بات سنیں گے۔
خیال رہے کہ چند روز قبل وفاقی وزیر برائے منصوبہ بندی احسن اقبال کی کراچی میں تاجروں سے ملاقات کے دوران تاجر رہنما عتیق میر نے ان سے کہا تھا، ’کچھ عرصے کے لیے مریم نواز ہمیں دے دیں اور مراد علی شاہ آپ رکھ لیں۔‘
عتیق میر کے اس بیان پر سندھ حکومت کی ترجمان سعدیہ جاوید نے سخت ردعمل دیتے ہوئے کہا تھا کہ، ’کسی خوشامدی سے رٹا لگوائی ہوئی بات کہلوانے سے زمینی حقائق تبدیل نہیں کیے جا سکتے۔ مراد علی شاہ منتخب وزیراعلیٰ ہیں، اور متعلقہ تاجر نے عوام کے مینڈیٹ کی توہین کی ہے۔‘
سندھ حکومت کے ایک اور ترجمان، سکھ دیو آسرداس ہمنانی نے کہا کہ، ’ایک تاجر کا خوشامدی بیان پوری تاجر برادری کی سوچ کی عکاسی نہیں کرتا۔ وزیراعلیٰ سندھ کی کارکردگی پیپلز پارٹی کے منشور کا حصہ ہے، اور کسی ایک بیان سے حقائق نہیں بدل سکتے۔‘
حکومتی ردعمل کے بعد تاجر رہنما عتیق میر نے سوشل میڈیا پر جاری ایک ویڈیو بیان میں وضاحت پیش کی۔
ان کا کہنا تھا کہ ’مریم نواز کو سندھ دینے کی بات میں نے مذاق میں کہی تھی، اور یہ کسی بلدیاتی کارکردگی کے حوالے سے نہیں تھی۔ مریم نواز کون سا وہاں کارکردگی کے جھنڈے گاڑھ رہی ہیں۔‘
عتیق میر نے مزید کہا، ’مریم نواز کا معاملہ بھی اپنے باپ اور چچا جیسا ہے کہ ”ساڈے کام نہ ویکھو، ساڈیاں آنیاں جانیاں ویکھو“۔‘
