افغانستان سے غیر ملکی اسلحے کی بڑی کھیپ پاکستان میں اسمگل کرنے کی کوشش ناکام بنا دی گئی، سیکیورٹی فورسز نے کارروائی کے دوران ٹرک سے جدید ساخت کا غیر ملکی اسلحہ اور میگزین برآمد کرلیے۔
تفصیلات کے مطابق پاک افغان سرحد پر سیکیورٹی فورسز نے بڑی کامیابی حاصل کرتے ہوئے غیر ملکی اسلحے کی بڑی کھیپ پاکستان اسمگل کرنے کی کوشش ناکام بنا دی۔
سیکیورٹی فورسز نے 8 جنوری 2025 کو پاک افغان سرحد سے متصل غلام خان بارڈر ٹرمینل پراسلحہ بردار ٹرک قبضے میں لیا تھا، جس میں جدید ساخت کا غیر ملکی اسلحہ اور میگزین برآمد ہوئے۔
برآمد شدہ اسلحے میں 26 ایم سولہ رائفلیں، ایم 16 اور ایم 4 رائفلوں کے 292 میگزین اور 10 ہزار سے زائد گولیاں شامل تھیں، اس کے علاوہ 9 کلاشنکوف میگزین اور 244 گولیاں، 744 لائٹ مشین گن گولیاں اور بڑی تعداد میں لنکرز بھی برآمد کیے گئے۔
پاکستان میں افغانستان سے لائے جانے والے غیر ملکی اسلحے کے مزید ثبوت سامنے آ گئے
ذرائع کے مطابق اسلحہ ٹرک کے ڈرائیور کیبن میں خفیہ طور پر چھپایا گیا تھا، سامان کی پیکنگ افغانستان میں کی گئی تھی، یہ اسلحہ پاکستان میں دہشت گردی کی کارروائیوں کے لیے استعمال کیا جانا تھا، پاکستان میں اس سے قبل بھی دہشت گردی کے واقعات میں غیر ملکی اسلحہ برآمد ہوا ہے۔
دفاعی ماہرین کا کہنا ہے کہ فتنہ الخوارج کی قیادت اور اس سے منسلک دہشت گردوں کی افغانستان میں موجودگی افغان طالبان اور فتنہ الخوارج کی ملی بھگت کاواضح ثبوت ہے۔
ماہرین کے مطابق یہ بات عیاں ہے کہ افغان چیک پوسٹوں کی جانب سے فتنہ الخوراج کو سہولت کاری فراہم کی جارہی ہے، اسلحہ کھیپ کی برآمدگی اس بات کا بھی ثبوت ہے کہ خوارج افغان طالبان کی چھتری تلے یہ سب کچھ کر رہے ہیں۔
دفاعی ماہرین مزید کہتے ہیں کہ پاکستان نے افغانستان کے شہریوں کی معاشی مشکلات کو کم کرنے کے لیے اپنے بارڈر ٹرمینلز کھولے تھے، افغان طالبان اور فتنہ الخوارج دہشت گردی کو بڑھاوا دے کر افغان عوام کے ساتھ بھی دشمنی کر رہے ہیں۔
انہوں نے مزید کہا کہ ایسی گھناؤنی کارروائیوں سےمحرومی کا شکار اور معاشی طور پر کمزور افغان تاجروں کے لیے مزید مشکلات پیدا ہو گئی ہیں، عام افغان شہریوں کی بھلائی کے لیے ضروری ہے کہ وہ افغان طالبان سےفتنہ الخوارج کیخلاف کارروائی کا مطالبہ کریں۔
